खरबूजां री नींद

उतराधै सींवाड़ै रा चावा-ठावा कवि हा जनकराज जी पारीक। श्रीकरणपुर रा रैवासी पारीक जी रा गीत अर कविता कदेई कवि मंचां री स्यान होया करता। वांरी संवेदनात्मक दीठ घणी ऊंडी, बात परोटणै अर कैवणै रो न्यारो ढंग
पण बगत रो अंवळो बायरो इस्यो चाल्यो कै ना कवि सम्मेलन रैया ना जनकजी। आज ‘हेत री हथाई’ में बांचस्यां पारीक जी री एक भोत सांतरी कविता ‘खरबूजां री नींद’……

खरबूजां री नींद

(मूळ कविता- श्री जनकराज पारीक)
उल्थो-हरिमोहन सारस्वत ‘रूंख’

सर्वे !
सर्वे किस्यो, साब ?
गांवां जिस्यो गांव
हुवै जिंयां ई है,
पींपळ जिस्यो पींपळ
बैठणै नै छियां ई है,
बड़ रो गाछ है,
मिनख!
नंई साब
छियां बैठ्या है
बै मिनख कोनी
भेड़ है !

सामीं कुओ है
कुअै पर रजली !
ना साब,
कुअै में पडै़ कोनी
बा तो पाणी भरै
नौ दिनां री जापायत नै
मांचौ सोयां किंया सरै,
इचरज क्यांरो साब ?
नौ दिनां पछै तो
आ भरयोड़ो घड़ो
सणै टोकणी उठा लेवै
सासूू इन्नै जापै सारू तीन मईना री
छुट्टी थोड़ी देवै !

इन्नै जिका पिरामीड सा
उभ्या दिसै-
तुड़ी रा कुप है
थेपड़्यां रा बटोड़ा है
बस इयां मानो
गोबर रा घोड़ा है।
लोग आंरी सवारी कद करै
बस बणा बोकरै
अर छेकड़ आंरै हेठै ई दब मरै.

ना साब,
बा कुर्सी दौड़ कोनी-
गुड़ बण रैयो है
दो चार लोग घाणी मांय जुड़ रैया है
तो दो चार गाळा दे रैया है
आपनै कदास लाग्यो हुवैला
बै पपलु रा मजा ले रैया है.

तास आंरै सारू खेलणै री नीं
खावणै री चीज है
अर अनाज पिसाणै री नीं
फगत उगाणै री चीज है.

खावणै रा लक्खण कठै है, साब !
ऐ मरणजोगा तो
जोड़ायत रो जोबन
बूढी मावड़ी रो बुढ़ापो
अर बेटी रो बाळपणो खावैला।
पांती आंवतो थुड़पणो चाबैला
अर जूणां रा दिन तोड़ता
अेक दिन पसर जावैला
जियां आज
काची उमर में मंगतु पसरग्यो.

बणेड़ी बात है, साब !
….खेत हाळी रा
खळा चौधरी री पंजाळी रा
पण मंगतु आ बात भूलग्यो
कांई ठाह क्यूं सुपनां में झूलग्यो
भरयै खळै में उभ्यै
चौधरी रै पगां पड़ग्यो
पांती सारू अड़ग्यो
बस बठैई जूण पूरी होगी, साब.

बै जिका भीड़ में
रोवता कूकता दिसै,
मंगतु रै कडूम्बै आळा है
चौधरी रै आदम्यां स्यूं
मंगतु री ल्हास ल्याया है
ल्हास ल्यावणियो मंगतु रो भाई है,
घुंघटै में बिलखती
बींरी भौजाई है
जिकी अबार ई राण्ड होई है
डर्याेड़ो सो टींगर
मंगतु रो छोरो है.

बदळो ?
ना साब,
बदळो बुदळो कीं नीं
गांव में इस्सी बातां री सिन्झ्या
बेगी ढळै
चुल्हा तो कदे कदास ई जगै
पण मिनख रोज बळै.

आप कांई सोचो
बदळो लेवण सारू
ओ छोरो डाकू बणसी ?
बो तो फिल्मां में हुवै, साब !
बड़ो हो’र ओ ई सागी जीव
चौधरी रो चक्कू बणसी
चौधरी नै दांतण झलासी
खेत स्यूं साग सब्जी लासी
अर सारी उमर गाळयां खासी.
कदेई घणी तीन पांच करी….
तो जिकै बाप रो बीज है
बींरी मौत मर जासी.

रिपोट ?
रिपोट किसी, साब !
गांव री गूंग है
सी ए टी कैट रा माइना तो जाणै कोनी
एफआईआर लिखासी ?
अर लिखासी
तो नेछो राखो, साब
मंगतु री मौत पासी।
इलाज ?
इलाज तो दोनूं है, साब !
खेती सारू
किरसै खन्नै
लक्कड़ रो हळ है
अर खळो चक्कण नै
चौधरी रै चक्कू मांय
तीखो फळ है.
आप इंरै मांय
कठै तांई माथो मारस्यो
अठै तो अबखायां रो जाळ है
लगोलग पड़ता छप्पनिया काळ है
चक्कू खरबूजै पर पडै़
का खरबूजो चक्कू पर
होवणो तो सागी हाल है.
आप आंरै मांय माथो मारस्यो
तो तंग हो जावोला
अर आज रो भाषण ई
आप सावळ नीं बोल पावोला.
आन्नै छोडो, साब !
कीं जूस-कॉफी लेल्यो
मिटिंग रो बगत हो रयो है.
गांव ?
गांव तो अखबारां में ई जाग्यो हो
नीं तो चौन री नींद ले रैयो है !