राजेश चड्ढ़ा.
सोलहवीं सदी दे लाहौर विच जन्मे सूफ़ी, शाह हुसैन ने पंजाबी भाषा विच सूफ़ी परंपरा दी काफ़ियाँ दी रचना कीती अते मनुखी प्यार नूँ परमात्मा दी ताँघ अते संसार दी नश्वरता वरगे विषयाँ ते केंद्रित कीता। शाह हुसैन नूँ इक पंजाबी सूफ़ी सँत कवि केहा जाँदा है। शाह हुसैन अकबर अते जहाँगीर दे समकाली सन अते गुरू अर्जुन देव जी अते छज्जू भक्त नाल उन्हाँ दे चँगे सम्बन्ध सन। उन्हाँ नूँ पंजाबी कविता दी काफ़ी शैली दा मोढी मनेया जाँदा है। शाह हुसैन ने अपणियाँ काफ़ियाँ विच परमात्मा दे प्रति प्रेम अते विछोड़े दी भावनावाँ दा प्रगटीकरण कीता है, जो सूफ़ी परंपरा दा इक अनिखरवाँ अंग है। शाह हुसैन दियाँ काफ़ियाँ फरोलियाँ जाण ते वखरे-वखरे रँग दिखायी दिंदे हन।
शाह हुसैन अपणी इक काफ़ी विच आत्म-ज्ञान अते आत्म-शुद्धि दी गल करदे होये आखदे हन-
रोंदा मूल न सौंदा ही।
जिस तन दरदां दी आह,
सोई तन रोंदा ही।
कन्यारी दी सेजै उप्पर,
सुखिया कोई न सौंदा ही।
चारे पल्ले मेरे चिक्कड़ बुडे,
केहड़ा मल मल धोंदा ही।
दरदां दा दारू तेरे अन्दर वसदा,
कोई संत तबीब मिलौंदा ही।
कहै हुसैन फ़क़ीर रब्बाणा,
जो लिख्या सोई होंदा ही।
शाह हुसैन कहँदे हन कि जिस दा शरीर दर्द नाल भर जाँदा है, ओही रोंदा है। कन्यारी दे फुल्लाँ दी सेज ते वी कोई दर्दमँद सुखी नहीं सौंदा। क्योंकि एह सुख वी सच्चा नहीं है। आत्म-शुद्धि दी गल करदेयाँ शाह हुसैन कहँदे हन कि मेरे चारों पासे चिकड़ है अते मैंनूँ नहीं पता कि केहड़ा इस नूँ मल-मल धो के साफ कर पावेगा। दुनिया दे हर दर्द दा इलाज अपणे अंदर ही है। प्रीत दे एस दर्द नूँ कोई संत या हकीम ही समझा सकदा है। ज़िंदगी दी हकीकत एह है कि जो कुज लिखेया है यानी जेड़ा नसीब विच है अते रब्ब दी रज़ा विच है ओ ही होणा है।
सच्चाई, सरलता अते अध्यात्मिक जीवन दी महतता ते जोर दिंदेयाँ शाह हुसैन अपणी इक काफ़ी विच कहँदे हन-
वत्त न दुनियां आवन।
सदा न फुले तोरिया,
सदा न लग्गे सावन।
एह जोबन तेरा चार देहाड़े,
काहे कूं झूठ कमावन।
पेवकड़ै दिन चार देहाड़े,
अलबत सहुरे जावन।
शाह हुसैन फ़क़ीर सांईं दा,
जंगल जाय समावन।
यानी दुनिया विच कुज वी हमेशा लयी नहीं है। एत्थे तक कि फुल्ल वी हमेशा नहीं खिड़दे अते सौण दा मौसम वी हमेशा नहीं रहँदा। जवानी सिर्फ़ चार दिनाँ दी है। यानी जवानी दी ताकत वी वक्त दे नाल घट होंदी जाँदी है। इस लयी क्यों झूठ अते पाखंड दा सहारा लेया जावे। एस दुनिया विच सब कुज आडँबर अते झूठे अहंकार नाल भरेया है। जीवन दे कुज दिन ही हन। अखीर विच सब नूँ अपणे प्रीतम कोल ही जाणा है कर्मा दा फल सजण ने ही देणा है। मैं ताँ अपणे प्रीतम दा फकीर हाँ। मैंनूँ ताँ प्रीतम दी प्रीत दे जंगल विच रच-वस जाणा है।
शाह हुसैन प्रेम दी राह नूँ सच्ची राह अते सँसार दी धुँधली अवस्था नूँ उजागर करदे होये अपणी इक काफ़ी विच आखदे हन-
मन अटक्या बे-परवाह दे नालि ।
उस दीन दुनी दे शाह दे नालि ।।
काज़ी मुल्लां मत्ती देंदे,
खरे स्याने राह दसेंदे,
इशक़ की लग्गे राह दे नाल ।।
नदीयों पार रांझन दा ठाणा,
कीता कउल ज़रूरी जाणा,
मिन्नतां करां मलाह दे नाल ।।
कहै हुसैन फ़क़ीर निमाणा,
दुनियां छोडि आख़र मर जाणा,
ओड़कि कंम अलाह दे नाल ।।
प्यार अते निरलिप्तता दी भावना नूँ दर्शाैंदे होये शाह हुसैन कहँदे हन कि मेरा मन अजेहे बेफ़िकरे नाल अटकेया होया है, जेड़ा दुनिया दा शाह है। काजी अते मुल्ला कुज होर समझौण दी कोशिश करदे हन। सच्चे सयाने कोई होर राह पौंदे हन।
शाह हुसैन कहँदे हन कि प्रीतम दा ठिकाणा नदियों पार है पर मिलण दा वादा कीता है अते उस नूँ लभण लयी मल्लाह अगे मिन्नताँ करणियाँ ज़रूरी हन। यानी प्यार दा सफ़र मुश्किलाँ नाल भरेया होया है।
जद सँसार नूँ छड के अखीर मरणा तय है अते सजण कोल ही जाणा है ताँ फेर हुण ही सजण दी याद नाल सच्चा प्रेम क्यों ना कराँँ। प्यार, वफ़ादारी, सब्र अते रब्ब दी किरपा दी व्याख्या दे नाल अपणी इक काफ़ी विच शाह हुसैन प्यार दे इम्तिहान अते प्यार दी ढुँगाइयाँ नूँ दर्शाैंदे होये कहँदे हन-
नाल सजन दे रहीए।
झिड़कां झम्बां ते तकसीरां,
सो भी सिर ते सहीए।
जे सिर कट्ट लैन धड़ नालों,
तां भी आह न कहीए।
चन्दन रुक्ख लगा विच वेहड़े,
ज़ोर धिङाने खहीए।
मरन मूल ते जीवन लाहा,
दिलगीरी क्युं रहीए।
कहै हुसैन फ़क़ीर सांईं दा,
रब्ब दा दित्ता सहीए।
शाह हुसैन कहँदे हन कि रहणा है ताँ सजन दे नाल रहणा है। प्यार विच निंदेया, निरादर अते तकलीफ़ाँ वी मँज़ूर हन।
प्रेम विच जेकर धड़ नाल सिर कट वी जाए फेर वी बगैर कुज कहे सजण नाल ही रहणा है। चन्दन दा दरख्त जद बग़ीचे विच ही होवे ताँ दूजी थाँ ते ताकत दी लोड़ नहीं हुँदी। जद मरणा ही है ताँ ज़िंदगी विच जी भर के मोहब्बत क्यों ना करिये, क्योंकि मेरी ज़िंदगी दा ताँ मकसद ही प्रेम है। इस लयी सजण वरगे रब्ब दा दिता सब स्वीकार है। शाह हुसैन ने प्रेम, अध्यात्मिक जीवन अते रब्ब दी किरपा दी महतता अते नाम सिमरन ते ज़ोर दिंदेयाँ अपणी इक काफ़ी विच आखेया है-
सज्जन दे गल बांह असाडी,
क्युं कर आखां छड्ड वे अड़्या।
पोसतियां दे पोसत वांगूं,
अमल पया असाडे हड्ड वे अड़्या।
राम नाम दे सिमरन बाझों,
जीवन दा की हज्ज वे अड़्या।
कहै हुसैन फ़क़ीर सांईं दा,
साहब दे लड़ लग्ग वे अड़्या।
शाह हुसैन कहँदे हन कि प्रीतम दे गले विच सदा मेरी बाँह होवे ताँ क्यों छडण नूँ आखाँ। जिस तरहाँ अफीम दी लत हड्डियाँ विच समा जाँदी है, उसे तरहाँ प्रेम मेरे जीवन विच रच-वस गया है।
सिमरन बगैर जीवन दा हुण कोई अर्थ ही नहीं रेहा।
हुण अपणे प्रीतम वरगे रब्ब दे नाल जुड़ना ही मेरी सच्ची मोहब्बत है।
प्रीत, प्रीतम दी पीड़ा, सजण दी लोड़ अते
उस नाल मिलण दी बेनती करदे होये शाह हुसैन अपणी काफ़ी दे मारफ़त कहँदे हन-
पोथी खोल्ह दिखा भाई बामणा,
प्यारा कद वो मिलसी सामना ।।
बन काहे बेला सभ फुल्या,
दरद माही दा दरि दरि हुल्या,
झुकि रहियां नी इशक पलामना ।।
देखो केडे मैं पैड़े पाड़दी,
मैं लंघदी ते नाग लताड़दी ।
सुत्त्यां शीहां नूं नित्त उलांघना ।।
मेरी जिन्द उते वलि हो रही,
मैनूं रोग ना हुन्दा को सही,
निति उठ बेले वलि तरांघना ।।
नित्त शाह हुसैन पुकारिदा,
सांईं तलब तेरे दरबार दा,
इकु टुक असां वलि झाकना ।।
प्रेम दी खोज अते उसदे भरम विच गवाचे
शाह हुसैन कह रहे हन कि हे भाई बाह्मण, पोथी खोल के दिखा कि मेरा सजण नाल मिलाप कदों होणा तय है ?
प्रेम दी पीड़ा अते बेसब्री इस तों वध की हो सकदी है कि सारा जँगल खिड़ेया होया है, पर मेरे प्रेम दा दर्द मैंनूँ दर-दर भटकण लयी मजबूर कर रेहा है।
मैं रुखाँ नूँ पुटदा हाँ अते सप्पाँ नूँ लँघ रेहा हाँ पर मेरे प्रीतम दी याद मैंनूँ हार मनण तों रोकदी है। मेरी जिंदगी उस प्यारे सजण लयी प्रेम दी ताँघ नाल भरी होयी है। मैंनूँ कोई रोग वी नहीं फेर वी मैं रात-दिन प्रीतम दी याद विच बेचौन रहँदा हाँ। शाह हुसैन कहँदे हन कि हे मेरे प्यारेया, मैं तेरे दर दी तलाश विच हाँ अते मैं बेनती कर रेहा हाँ कि इक वार मैंनूँ अपणे दर दी झात मार लैण दे। शाह हुसैन दे सूफी सिद्धाताँ विच प्रेम अते निरलिप्तता दा भाव मुख रेहा है। शाह हुसैन दियाँ काफ़ियाँ इश्क़े हक़ीक़ी, अध्यात्मिक जीवन अते अपणे मुर्शिद दी महतता दा सच्चा-सुच्चा रचाव हन।
-लेखक जाने-माने शायर और आकाशवाणी के पूर्व वरिष्ठ उद्घोषक हैं
