राजेश चड्ढ़ा.
मर रही है मेरी भाषा शबद-शबद
मर रही है मेरी भाषा चुप-चाप
जद वी मरदा है कोई शबद
मर जांदा है उस नाल ही कोई दरख़्त
कोई परिंदा, कोई रिश्ता, कोई अहसास
मेरे वड्ड-वड्डेरेयां ने
मिट्टी श्च गड्ड के रखी सी एह बोली
अज्ज ऐह मिट्टी तों उखड़ रही है
कविता ऐह कह रही है कि भाषा सिर्फ़ संचार दा साधन नहीं हुंदी, सगों ऐह साडा इतिहास अते विरसा हुंदी है। जे भाषा मर जावे, तां साडा इतिहास वी बंजर हो जांदा है, जिस विच कुज वी नवां नहीं उग सकदा।
अपणे अजेहे अल्फ़ाज़ ज़रिये मां बोली नूं मान देण वाले डा. सुरजीत पातर दा नां, आधुनिक पंजाबी साहित्य दे ओस शिखर दा नां है, जिस ने अपणी कविता अते ग़ज़ल राहीं पंजाबी मां-बोली नूं तमाम दुनिया विच मान-सणमान दिवाया। पातर साहब दी शख्सियत अते उन्हां दी साहित्य सेवा इकलौते कवि दी सेवा नहीं, सगों इक पूरे युग दी चेतना दा प्रकटावा है। ऐही सुमेल उन्हां नूं पंजाब दी आवाज़ बणौंदा है।
डा. सुरजीत पातर दा जन्म 14 जनवरी, 1945 नूं पंजाब सूबे दे ज़िले जालंधर दे पिंड ‘पातर’ विच होया। उन्हां ने अपणे पिंड दे नां नूं ही अपणा उपनाम बणाया। पातर साहब ने पंजाबी कविता नूं, ख़ास करके ग़ज़ल नूं, इक नंवी सुंदरता बख़्शी। उन्हां दी शैली दी सब तों वड्डी खासियत उन्हां दे अनूठे प्रतीक अते बिंब हन। सुरजीत पातर-बिरख, हवा, हनेरा अते शमादान वरगे प्रतीकां दे ज़रिये ज़िंदगी दे गूढ़ रहस्य नूं बड़े सहज ढंग नाल बयान करदे रहे। उन्हां दी कविता विच दार्शनिक गहराई होण दे बावजूद भाषा बोझल नहीं हुंदी, बल्कि आम मनुख दे अनुभवां नाल जुड़ी रहंदी है। डॉ. सुरजीत पातर दी रचनावां विच मनुखी संवेदनावां अते सामाजिक असलियत दे वख-वख रंग दिखाई दिन्दे हन-
कुज केहा तां हनेरा जरेगा किवें
चुप्प रेहा तां शमादान की कहणगे
गीत दी मौत इस रात जे हो गयी
मेरा जीणा मेरे यार किंज सहणगे
एत्थे हनेरा दमनकारी ताकत दा प्रतीक है अते शमादान अपणी अंतरात्मा दी आवाज़ है। कवि कहंदा है कि जे सच बोलेया जावे, तां सत्ता नूं पीड़ा होवेगी, पर जे चुप रहिये, तां अपणी अंतरात्मा अते नैतिकता सवाल पुच्छेगी। अतीत दी बेबसी नूं लै के पंजाब दे संताप दा ज़िक्र करदेयां सुरजीत पातर आखदे हन-
मेरे राहां विच खड़े ने
अजहे मोड़ वी
जिथे कहंदा है खुदा
पीछे न मुड़ के वेखणा
जदों कदे वी मुड़ के
तक्कणा चौहंदा हां मैं
तां मेरे सामणे पत्थर दी
इक दीवार है
मैं किस तरहां छड्ड देवां
एह अध्धा रस्ता
मेरे पिछे मेरे पैरां दे
निशान खो गए ने
कविता दियां ऐह सतरां पंजाब दे त्रासदीपूर्ण दौर दी तस्वीर पेश करदियां हन। समय अते हालात इंसान नूं अपणे अतीत दियां सुहावनियां यादां भुलण लयी मजबूर कर दिन्दे हन। जदों वी कोई अपणी जड़ां वल मुड़ के देखणा चौहंदा है, तां कठोर हकीकत पत्थर दी दीवार बण के सामणे आ खड़ी हुंदी है। बिरख नूं वफ़ादारी अते स्थिरता दा प्रतीक मनदे होये सुरजीत पातर ने आखेया है-
बलदा बिरख हां खत्म हां
बस शाम तीक हां
फेर वी किसे बहार दी करदा उड़ीक हां
मैं तां नहीं रहांगा
मेरे गीत रहणगे
पाणी ने मेरे गीत
मैं पाणी ते लीक हां
कवि दी निगाह विच बिरख मनुखी वफ़ादारी अते अडिगता दा प्रतीक है। समय बदल जांदा है, हालात बदल जांदे हन, पर कवि अपने सिद्धांतां अते जड़ां नाल जुड़ेया रहंदा है। हवा दी हर सरसराहट विच कवि अपणे प्रीतम नूं ही याद करदा है। मनेया जांदा है कि हर शबद विच इतिहास दी गूंज छुपी होयी है। मां बोली बिना रूह वी अनाथ हो जांदी है अते सभ्याचार दी रूह चुप्प-चाप मुरझा जांदी है। भाषा दे अस्तित्व दी चिंता करदेयां सुरजीत पातर आखदे हन-
मेरे बच्चे मेरी कबर ते आवणगे
पर ओन्हां दे रुदण विच
मेरी भाषा दा विरलाप नहीं होवेगा
ओह रोवणगे तां सही
पर उन्हां दे हंझू
मेरी बोली विच गल्ल नहीं करणगे
सुरजीत पातर बखूबी समझदे सन कि जदों शब्द मरदे हन, तां नाल ही इक संस्कृति अते चेतना वी हौली-हौली मर जान्दी है। सुरजीत पातर ने पंजाब दे दर्द, उसदी विरासत अते पंजाब दे लोकां दे विस्थापन उत्ते बहोत ही भावुक हो के आखेया है-
लग्गी नज़र पंजाब नूं इस दी नज़र उतारो
लै के मिर्चां कौड़ियां, एहदे सिर तों वारो
एहदे सोने वरगे खेतां नूं, केहड़ी नज़र है लग्गी
केहड़ी ठंडी हवा है, साडे पिंडां दे विच वग्गी
पिंडां दे विच सुन्न है, ते शहरां दे विच शोर
एह केहा वक़्त आ गया, बदल गई है तोर
जत्थे जा रहे ने दूर नूं, परदेसां दे वल्ल
साडी मिट्टी रुळ रही, कोई दस्सो इस दा हल
सुरजीत पातर नूं शायर-ए-पंजाब केहा जांदा है। उन्हां ने पंजाब दे उस दर्द नूं आवाज़ दिती है जिस नूं लोक महसूस तां करदे हन, पर कह नहीं सकदे। पातर दी कविता विच दुख तां है, पर उस दुख दा इक मान वी है-
आई पतझड़ तां फेर की है
तू अगले साल लयी यकीन रखीं
मैं लभ के कितों लेहानां कलमां
तू फुल्लां जोगी जमीन रक्खीं
सुरजीत पातर नूं असीं संवेदना, सुंदरता, सच अते हौसले दा शायर कह सकदे हां। पातर इंसाफ अते हक़ दे राह ते चलण वाला शायर सी। पातर लिखदे हन-
पंछियां नूं उड़ान दिंदा हां
लो मैं अपना बयान दिंदा हां
तपदे लोकां दे सिर करो छावां
बिरख हां ऐही बयान दिंदा हां
पातर साहब दी प्रमुख किताबां विच-
हवा विच लिखे हरफ़, बिरख अरज़ करे, हनेरे विच सुलगदी वर्णमाला अते लफ़ज़ां दी दरगाह शामिल हन। सुरजीत पातर नूं 1993 विच साहित्य अकादमी पुरस्कार, 2009 विच सरस्वती सम्मान अते 2012 विच पद्म श्री वरगे सम्मान नाल नवाज़्या गया। पंजाब एग्रीकल्चरल यूनिवर्सिटी, लुधियाना विच प्रोफेसर दे तौर ते उन्हां ने लम्बे वक्त तक अपणियां सेवावां दित्तियाँ अते 11 मई 2024 नूं लुधियाना विच ही सुरजीत पातर इस दुनिया नूं अलविदा कह गये।
डॉ सुरजीत पातर दी शख्सियत पंजाबी रूह दा आईना है। उन्हां ने पंजाबी कविता नूं बौद्धिक गहराई अते संगीत दी मधुरता दोवें खासियतां प्रदान कीतियां।
सुरजीत पातर सिर्फ़ अक्खरां दे लेखक नहीं सन, सगों पंजाबी चेतना दे रहबर सन। उन्हां ने ग़ज़ल नूं अमीरी बख्शी अते कविता नूं आम बंदे दे दर्द नाल जोड़ेया। पातर साहब भांवे शारीरिक तौर ते अज्ज साडे विच नहीं हन, पर उन्हां दे हवा विच लिखे हरफ़ रहंदी दुनीया तक पंजाबी दिलां दे विच गूंजदे रहणगे।
चल पातर हूंण ढूंढण चलिए भुलियां होइयां थांवां
कित्थे-कित्थे छड आये हां
अणलिखियां कवितावां
-लेखक आकाशवाणी के पूर्व वरिष्ठ उद्घोषक और जाने-माने शायर हैं
About the Author
