राजेश चड्ढ़ा.
कहावतां समाज दे पुराणे ताणे-बाणे विचों निकलदियां हन। इन्हां दा इतिहास किसे लिखती किताब विचों नहीं, सगों एह साडे बुज़ुरगां दे तजुरबेयां ते घरेलू जीण-थीण दे तरीकेयां विचों पैदा होइयां हन। पंजाबी कहावतां या अखाण, साडे विरसे दा अनमोल गहणा हन। एह थोड़े शबदां विच गुज्झी ते गहरी गल कह दिंदीयां हन।
‘अन्न नूं रोंदी, ते चक्की नूं चुम्मदी’ पंजाबी विरसे दी एह कहावत साडे बुज़ुरगां दे सदियां पुराणे तजुरबे दा निचोड़ है। एह कहावत उन्हां लोकां दे किरदार नूं बयान करदी है जो दिखावा तां बहुत करदे हन पर जदों कम्म करण दी वारी औंदी है, तां बहाने बणा के पल्ला झाड़ लैंदे हन। संत कबीर आखदे हन-
कथनी थोथी जगत में
करनी उत्तम सार
कहैं कबीर करनी भली
उतरै भवजल पार
कहण दा भाव है कि जगत विच सिर्फ़ गल्लां करणियां बेमानी हुंदियां हन, असली सार तां करनी यानी मेहनत या अमल विच है। जेकर कोई कम्म ही नहीं करेगा, तां उसदा पार-उतारा यानी ओह कामयाब किवें होवेगा?
आखेया जांदा है कि पुराणे वक्त विच इक पिंड विच इक माई रहंदी सी जिसदा नां ‘करतारो’ सी। करतारो दे घर विच रब्ब दा दित्ता सब कुज सी, पर उसदी आदत कुज अजेही सी कि करतारो सारे पिंड विच अपणे-आप नूं सब तों दुखी ते लाचार विखौंदी सी।
पिंड दीयां जनानीयां जदों सवेरे अमृत वेले उठ के अपणे-अपणे घरां विच चक्कीयां पीसदीयां सन, तां उन्हां दी ‘घूं-घूं’ दी आवाज़ दूर-दूर तक जांदी सी। चक्की पीसणा ओस वेले दी सब तों वड्डी मेहनत सी। पर करतारो दी चक्की कदे नहीं सी चली।
सवेरे जदों पिंड दीआं औरतां खूह ते पाणी भरन जांदीयां, तां करतारो उत्थे बैह के ऊच्चे-ऊच्चे हौके भरदी अते आखदी, ‘नी भैणो! मेरे घर तां दाणे मुक्क गए हन, न्याणे भुक्खे सौं रहे हन। रब्ब जाणे साडा की बणेगा?’ उसदा एह रोणा सुण के सारियां उस ते तरस खा जांदियां। कोई आटा दे दिंदी, कोई दाणे दे दिंदी।
इक दिन पिंड दी इक सियाणी बुढ़ी, जिस नूं ‘बेबे निक्को’ आखदे सन, करतारो दे घर गई। बेबे ने वेखेया कि करतारो अपणी पुरानी चक्की दे कोळ बैठी उसदे दोवें पाटां नूं बड़े प्यार नाल साफ़ कर रही है। करतारो चक्की दे हत्थे नूं चुम्म रही सी, उस ते माथा टेक रही सी ते अरदासां कर रही सी-
हाय मेरी निमाणी चक्की! तूं तां रब्ब दा रूप हैं, तूं तां अन्न देणी हैं।
पर बेबे निक्को ने वेखेया कि चक्की दे आले-दुआले जाले लगे होये सन। चक्की कदे चली ही नहीं सी। करतारो चक्की दी पूजा तां कर रही सी, उसनूं चुम्म तां रही सी, पर उसनूं चलौण दी हिम्मत नहीं कर रही सी।
बेबे निक्को ने हंस के आखेया-
नी करतारो! एह तां ओही गल हुई-अन्न नूं रोंदी, ते चक्की नूं चुम्मदी।
इस कहाणी विचों इक वड्डा सच निकल के औंदा है कि आलस नूं धर्म जां मजबूरी दा पर्दा देण वाले समाज विच बहुत सारे लोक हन जो अपनी नालायकी या आलस नूं लुकौण लई बहुत वड्डे आदर-सत्कार दा मुखौटा पा लैंदे हन। करतारो चक्की नूं इस लयी चुम्मदी सी ताकि कोई उसनूं एह ना कहे कि ‘तूं कम्म नहीं करदी’। ओह जतौंदी सी कि मैं चक्की दा बहुत सत्कार करदी हां, पर असल विच ओह चक्की चलौण तों बचणा चौंहदी सी।
दर असल हर इंसान नूं अन्न या कामयाबी तां चाहीदी है, पर ओह उस चक्की या संघर्ष तों डरदा है। ‘अन्न नूं रोंदी’ अजेही अवस्था है जदों असीं रब्ब कोळों तां मंगदे हां कि सानूं फल मिले, पर ‘चक्की नूं चुम्मदी’ गल्ल दे मुताबिक असीं सिर्फ़ साधन दी पूजा करदे रह जांदे हां, उन्हां नूं इस्तेमाल नहीं करदे।
जेकर इक बच्चा रोवे कि मेरे नंबर चंगे नहीं आए अते सारा दिन किताबां नूं झाड़-पूंज के रखदा रहे, उन्हां दी पूजा करे पर पढ़े इक अखर वी ना, तां उस ते एह कहावत बिल्कुल सही बैठदी है।
कई लोग ज्ञान दियां वड्डीआं-वड्डीआं गल्लां करदे हन, विस्तार विच भाषण दिंदे हन, पर जदों समाज विच असली कम्म करण दी वारी आवे, तां पीछे हट जांदे हन। एह वी ‘चक्की चुम्मणा’ ही है।
साडे बुज़ुरगां ने एह कहावत सानूं लच्छेदार गल्लां करन लयी नहीं, सगों मेहनत नाल जुड़न लयी दस्सी सी। उन्हां दा कहणा सी कि-रोण नाल रोटी नहीं मिलदी अते चक्की नूं सत्कार देण नाल आटा नहीं पिसदा। आटा तां ही मिलेगा जदों हत्था फड़ के बांहवां दी ताकत नाल चक्की गेड़ी जावेगी।
एह कहावत साडी पंजाबी गैरत अते हिम्मत दा प्रतीक है। एह सानूं खबरदार करदी है कि दिखावे दी दुनिया विचों निकल के असलियत दे राह ते चलिए। चक्की नूं सिर्फ चुम्मणा ही काफी नहीं, उस विच दाणे पा के पीसणा वी ज़रूरी है।
-लेखक जाने-माने शायर और आकाशवाणी के पूर्व वरिष्ठ उद्घोषक हैं
About the Author
