राजेश चड्ढ़ा.
इस नाशवान दुनिया दे विच इक प्रेम ही है जेड़ा दिलां दे विच दरेया बण के सदा बहंदा रहंदा है। इसदे बावजूद वक़्त दीयां सीमावां तों पार अजोके दौर विच असीं प्यार नूं दिनां विच वंड लेया है, पर प्यार सिर्फ़ दो शरीरां दा मिलाप नहीं, सगों ‘मैं’ तों ‘तूं’ तक दा सफ़र है। जदों मनुख प्रेम विच हुंदा है, तां उस लई हर पल, हर साह अते हर धड़कण उस मुहब्बत दा हिस्सा बण जांदी है।
सूफ़ी दरवेशां ने प्यार नूं किसे ख़ास दिन नाल नहीं जोड़ेया, सगों इस नूं जीवन दा मनोरथ मनेया है। पंजाबी साहित्य दी बुनियाद विच ही प्रेम रचेया होयेआ है। प्रेम दी निरंतरता दे गवाह पंजाबी दे पहले कवि 12वीं सदी दे सूफ़ी संत फ़रीद ने प्रेम नूं इक अजेही कशिश मनेया है जिस तों बिना शरीर महज़ इक पिंजर है। फ़रीद ने आखेया है-
बिरहा बिरहा आखीऐ बिरहा तू सुल्तानु
फ़रीदा जितु तनि बिरहु न ऊपजै सो तनु जाणु मसानु
एत्थे बिरहा दा मतलब सिर्फ विछोड़ा नहीं, सगो महबूब नूं पौण दी अजेही तड़प है जेड़ी हर पल सीने विच बलदी रहंदी है। जेकर एह तड़प साडे अंदर हर वेले मौजूद है, तां हर पल ही प्रेम दा पल है।
श्री गुरुनानक देव जी दी बाणी विच कुदरत नाल प्रेम दा ज़िकर औंदा है। उन्हां लयी कुदरत दा हर मंज़र महबूब दा ही रूप है। श्आरतीश् विच उन्हां ने ब्रह्मांड दी हर हलचल नूं इक प्रेम-मयी इबादत वजहों पेश कीता है। बाबा नानक कहंदे हन-
गगन मै थालु रवि चंदु दीपक
बने तारिका मंडल जनक मोती
धूपु मल आनलो पवणु चवरो करे
सगल बनराइ फूलंत जोती
जदों असीं हवा, फुल्लां अते तारेयां विच वी प्रेम वेखदे हां, तां फेर प्रेम किसे खास दिन दा मोहताज किस तरहां हो सकदा है।
आधुनिक पंजाबी कविता दे संस्थापकां विचों इक प्रो. पूरन सिंह प्रेम नूं किसे कानून या रस्म विच बन्हण दे सख़्त खिलाफ सन। प्रोफेसर पूरन सिंह मुताबिक प्रेम इक आज़ाद रूह है। प्रेम तां अजेहा है जेड़ा बिना दस्से ही रग-रग विच वस जावे, जेड़ा मोयां नूं वी ज्यौंदा कर देवे। पूरन सिंह दे प्रेम विच बेपरवाही है। उन्हां आखेया है कि जदों असीं कसमां-वादेयां विच प्यार नूं लपेटदे हां, तां असीं उस दी रूह मार दिंदे हां। उन्हा दी नज़र विच जदों कोई हल चलौंदा किसान अपणे खेतां नाल प्यार करदा है, या कोई मां अपणे बच्चे नूं निहारदी है, अजेहा हर लमहा प्रेम दा सब तों उच्चा शिखर है।
पंजाबी कविता नूं नवें रूप अते नवियां शैलियां विच प्रस्तुत करण वाले पंजाबी कविता दे मोढी कवि धनी राम चात्रिक धरती अते सभियाचार दा प्रेम दा ज़िक्र करदेयां आखदे हन प्रेम सिर्फ दो इंसानों विचकार नहीं हुंदा। उन्हां दी कविता विच पंजाब दी मिट्टी, मेलेयां अते किस्सेयां ज़रिये प्रेम झलकदा है।
जदों असीं अपणी बोली, अपणे विरसे अते अपणियां जड़ां नाल जुड़े हुंदे हां, तां साडा सारा जीवन अपणे-आप प्रेम-मयी हो जांदा है। चात्रिक जी दी कविता सानूं एह एहसास करौंदी है कि प्रेम साडे आसे-पासे दी हर चीज़ विच रचेया-वसेया है, बस उस नूं महसूस करण वाली नज़र चाहीदी है।
16वीं सदी विच होये सूफ़ी माधो लाल हुसैन यानी शाह हुसैन ने प्रेम विच अपणा आप गवौण दी गल कीती है। उन्हां दियां काफ़ीयां विच प्रेम इक रक़्स है जो रूह विच हर वेले चलदा रहंदा है-
नी मैं वारी, वे मुख परदा न पा
तेरे नाम तों मैं सदके जावाँ
मुख परदा न पा
हुसैन लयी प्रेम दा मतलब है-अपणे महबूब दे दर ते फ़कीर बण के रहणा। एह फ़कीरी किसे खास दिन लयी नहीं हुंदी, एह तां उम्र भर दा सरमाया है। उन्हां ने प्रेम नूं बाज़ारी चीज़ नहीं बणन दित्ता, सगों मन दे अंदर दी इक ऐसी धुखणी मनेया है जेड़ी हौली-हौली पूरे वजूद नूं रौशन कर दिंदी है।
दर असल सारा दा सारा साहित्य सानूं एह जाच सिखौंदा है कि असीं अपणे हर लम्हे नूं प्रेम नाल किवें रंगणा है। जिवें 18वीं सदी विच बुल्लेशाह ने केहा सी-
इश्क दी नवियों नवीं बहार
इश्क भुलाया सजदा तेरा
हुण क्यो ऐवें पावें झेड़ा
बुल्ला हुंदा चुप बथेरा
इश्क करेंदा मारो मार
इश्क दी नवियों नवीं बहार
एह बहार कदे पुराणी नहीं हुंदी अते न ही किसे खास मौसम या वक्त दी उडीक करदी है। एह तां साडे अंदर हर वेले खिड़ी रहणी चाहीदी है।
प्यार दी सदीवी तड़प नूं 18वीं सदी विच वारिस शाह ने ‘हीर’ दे ज़रिये इक अटूट लड़ी वजहों पेश कीता है। हीर अते रांझे दा प्यार किसे ख़ास मौके दा मोहताज नहीं सी। वारिस दी हीर कहंदी है-
राँझा राँझा कर दी नी मैं
आपे राँझा होई
सद्दो नी मैनूँ धीदो राँझा
हीर ना आखो कोई
राँझा मैं विच्च मैं रांझे विच्च
होर ख़याल ना कोई
एह सिखर है उस अवस्था दा, जित्थे प्रेमी अपणे महबूब विच इन्ना रच जांदा है कि उस लयी दिन, रात अते वक्त दा फ़र्क वी मिट जांदा है। एत्थे प्यार कोई कारज नहीं, सगों होंद बण जांदा है।
आज़ादी तों बाद दे पंजाबी साहित्य विच शिव कुमार बटालवी इक अजेहा कवि है जिसने उडीक नूं प्रेम दा सुच्चा पल दसेया है। शिव ने पीड़ां नूं वी प्रेम दा ही रूप मनेया है। शिव कुमार बटालवी कहंदे हन-
भट्ठी वालीए चम्बे दिये डालिए
नी पीड़ां दा परागा भुन्न दे
तैनूं देयां हंझूआं दा भाड़ा
नी पीड़ां दा परागा भुन्न दे
भट्ठी वालिए
अज्ज दे दौर विच जदों ‘इंस्टेंट’ प्यार दा ज़माना है, शिव दी कविता सानूं एह याद करौंदी है कि प्रेम दा असली संवाद तां उस ठहराव विच है जो हर पल नूं यादगार बणा दिंदा है। शिव बटालवी अपणे महाकाव्य ‘लूणा’ विच औरत दे मन दे प्रेम अते इच्छावां दी जेड़ी गल करदे हन, ओह गल प्रेम दे मनोवैज्ञानिक पख नूं उघाड़दी है।
अमृता प्रीतम ने प्यार नूं इक कायनाती सच वजहों चितेरेया है। अमृता लयी प्यार सामाजिक बंधनां अते वक्त दीयां घड़ीयां तों आज़ाद है। अमृता ने केहा है-
मैं तैनू फ़ेर मिलांगी
कित्थे ? किस तरहां पता नई
एह जिस्म मुक्कदा है
तां सब कुछ मुक्क जांदा हैं
पर चेतना दे धागे
कायनाती कण हुन्दे ने
मैं ओन्हां कणा नु चुगांगी
ते तैनु फ़ेर मिलांगी
अमृता दी कविता सिर्फ़ इक वादा नहीं, सगों एस विश्वास दा प्रगटावा है कि प्यार समें दी सीमा तों परे है।
इसे तरहां अवतार पाश वरगे कवि ने प्यार नूं ज़िंदगी दे संघर्ष नाल जोड़ेया है। पाश आखदे हन-
मैनूं देश दी भक्ति लयी
कोई होर शब्द नहीं मिलदा
मेरे लयी भारत दे अरथ
किसी खास खेत दे बन्ने ने
जिस दी मुश्क
मेरे हल दी फाल नाल रली होई है।
पाश दा प्यार ओह नहीं जेड़ा सिर्फ़ चन-तारेयां दीयां गल्लां करे, सगों ओह है जेड़ा खेतां विच कारज करदेयां, मुसीबतां नाल लड़देयां वी मनुख दे अंदर ज्यौंदा रहे।
पंजाबी साहित्यिक परंपरा विच ‘इश्क’ नूं ‘मजहब’ मनेया गया है। भांवे ओह हाशम शाह दी ‘सस्सी’ होवे जिसने थलां दी तपदी रेत नूं वी प्रेम लयी कबूल कीता, या फेर कादरयार दा ‘पूरन भगत’। हर थां प्रेम इक तपस्या वजहों उभरदा है। तपस्या कदे वी किसे खास वक्त लयी नहीं हुंदी, तपस्या तां निरंतर चलण वाली प्रक्रिया है। जिवें भोजन खाणा या साह लैणा साडी ज़रूरत है, उसे तरहां ही साहित्यिक पात्रां लयी प्रेम उन्हां दी आत्मिक ज़रूरत है।
पंजाब दा साहित्य सानूं एही संदेश दिंदा है कि प्रेम नूं कैलेंडर दीयां तारीखां विच कैद करणा उस दी तौहीन है। प्रेम तां अजेही खुशबू है जेड़ी फुल्ल दे खिड़न तों लैके उस दे झड़न तक उस दे नाल रहंदी है। जदों वी असीं किसे दी मदद करदे हां, किसी दे दर्द नूं वंडौंदे हां, या सिर्फ़ किसी दी याद विच चुपचाप बैठदे हां, तां अजेहा हर पल प्रेम विच ही रचेया हुंदा है।
एह साहित्यिक मिसालां गवाह हन कि दुनिया प्रेम दे सिर ते ही टिकी होयी है। जेकर प्रेम सिर्फ इक दिन लयी हुंदा, तां शायद दुनिया कदों दी बंजर हो गई हुंदी।
इस लयी प्रेम किसे खास घड़ी या किसे खास दिन दी गल नहीं, प्रेम तां इक जीवन-जुगत है।
-लेेखक जाने-माने शायर और आकाशवाणी के पूर्व वरिष्ठ उद्घोषक हैं
About the Author
