राजेश चड्ढ़ा
मात-भाषा केवल गलां करन दा जरिया नहीं हुंदी, एह तां रूह दी बोली है। असीं दुनिया दी कोइ वी भाषा सिख लईये, पर जदों असीं अरदास करदे हां, जदों असीं दर्द विच हुंदे हां जां जदों असीं दिल खोल के हसदे हां, तां साड्डे बुल्लां ते अपणी माँ-बोली ही औंदी है। अंतर्राष्ट्रीय मात भाषा दिवस सानूँ याद दिलौंदा है कि जे जड़ां सुक्क जावण तां रुख कदे हरे नहीं रह सकदे। पंजाबी साडी ओहो जड़ है जिसने सानूँ दुनिया विच इक वखरी पछाण दित्ती है।
पंजाबी बोली दी अमीरता दा अंदाज़ा इस गल्ल तों लाया जा सकदा है कि इसने ऐसे कलमकार पैदा कीते हन, जिन्हां ने दुनिया दे साहित्य विच अपणा लोहा मनवाया है।
अमृता प्रीतम ने पंजाबी बोली नूँ अंतराष्ट्रीय पदर ते पछाण दिवाई। जदों उन्हां ने ‘अज्ज आखां वारिस शाह नूँ’ लिखेया, तां एह सिर्फ़ इक कविता नहीं सी, एह वंढे होये पंजाब दी चीख़ सी। उन्हां दे विचार सानूँ दसदे हन कि बोली किवें दरद नूँ अमर कर दिंदी है-
अज्ज आखां वारिस शाह नूँ
कितों कबरां विचों बोल
ते अज्ज किताब-ए-इश्क दा
कोई अगला वरका फोल
अमृता दी लिखत ने पंजाबी नूँ अजेही नज़ाकत दित्ती जो किसे होर भाषा विच मिलणी मुश्किल है।
जदों असीं जज़बातां दी गल्ल करदे हां तां शिव दे बिना पंजाबी अधूरी है। शिव ने पंजाबी बोली नूँ अजहे शबद दित्ते जो संगीत वांगु कन्नां विच रस घोलदे हन। उन्हां ने आम लोका दी बोली नूँ साहित्यक उचाईयां ते पहुँचाया-
मैनूँ विदा करो, मेरे राम
मैनूँ विदा करो
कोसा हँजू
शगन पाओ झोली
बिरहा तली धरो
मैनूँ विदा करो,मेरे राम
मैनूँ विदा करो
शिव दी अजेही कविता दसदी है कि पंजाबी बोली विच किन्नी कोमलता अते पिघला देण वाली ताकत है।
जदों बोली हक अते सच दी लड़ाई लयी खड़दी है, तां पाश वरगे कवि जनम लैंदे हन। पाश ने सानूं दसेया है कि पंजाबी सिर्फ़ इश्क-मुश्क दी ही नहीं, सगों लुट-खसूट दे खिलाफ लड़न दी वी बोली है। उन्हां दी मशहुर सतर है-
सब तों खतरनाक हुंदा है
साड्डे सुपनेयां दा मर जाणा
सबसे खतरनाक हुंदा है
मुर्दा शांति नाल भर जाणा
ना होणा तड़प दा
सब कुज सह जाणा
घर तों निकलणा कम्म ते
अते कम्म तों घर औणा
सबसतों खतरनाक हुंदा है
साड्डे सुपनेयां दा मर जाणा
पाश सानूँ सिखौंदे हन कि अपणी बोली नूँ ज़िंदा रखणा ही असल इन्कलाब है।
पंजाबी भाषा दा सुमेल सूफ़ीवाद अते गुरमति दर्शन नाल बहुत गहरा है। बाबा फरीद दा शलोक श्फरीदा जे तू अकल लतीफ…श् साडी नैतिक शिक्षा हन। गुरु नानक देव जी ने श्आसा दी वारश् अते होर दूजियां बाणियां राहीं पंजाबी नूँ जो दर्शन दित्ता, उसदे कारण ही अज्ज असीं मानसिक अते आत्मिक तौर ते बलवान हां। गुरु अंगद देव जी ने गुरमुखी लिपि दे के सानूँ साडा अपना ‘अक्खर-विरासत’ बख़्शेया है।
साडी बोली विच गिद्धा है, भंगड़ा है, अते सब तों वध ‘खीर-खंड़’ वरगी मिठास है। साड्डे लोकगीत, टप्पे, माहिए, सुहाग अते घोड़ियां, एह दसदे हन कि साडा हर रिश्ता बोली दे किस सूत्र नाल बुणेया होया है।
जदों इक माँ अपणे पुत्तर नूँ ‘लोरी’ दिंदी है, तां ओह असल विच पंजाबी दे अगले वारिस नूँ अपनी विरासत सोंप रही हुंदी है।
अज्ज वैश्वीकरण दे नां ते साडी नवीं पीढ़ी अपणी बोली तों दूर हो रही है। स्कूलां विच माँ बोली बोलण ते जुरमाना हुंदा है, जो कि शर्मनाक है। असीं अंगेज़ी सिखण दी चाह विच अपणी माँ-बोली नूँ पिछड़ी समझण लग्ग पये हां। पर सानूँ याद रखणा चाहीदा है कि जदों भाषा मरदी है, तां उस कौम दा हज़ारां सालां दा तजुरबा वी मर जांदा है।
औण वाली पीढ़ी लयी अंतर्राष्ट्रीय मात भाषा दिवस ते साडा एहो सुनेहा होणा चाहिदा है कि साड्डा घर पहला स्कूल है अते ओथे पंजाबी नूँ प्रधानता देणी बहोत ज़रूरी है। एस दे नाल-नाल सोशल मीडिया अते इंटरनेट ते माँ बोली लिखण अते बोलण दा गर्व महसूस करणा वी बहोत ज़रूरी है।
साड्डी माँ बोली पंजाबी सिर्फ़ लफ़्ज़ां दा समूह नहीं है, एह साडी रूह दी धड़कण है। जदों तक पंजाब अते पंजाबी ज्यौंदे हन, साडी पछाण कायम है। साडी एहो अरदास है कि हर इक माँ बोली दा परचम पूरी दुनिया विच हमेशा कायम रहे।
-(अंतर्राष्ट्रीय मात भाषा दिवस विशेष आलेख, लेखक जाने-माने शायर हैं)
About the Author
