राजेश चड्ढ़ा
पंजाबी साहित्य दे आकाश विच गुरदयाल सिंह इक अजेहा चमकदा सितारा हन, जिन्हां ने अपनी लेखणी नाल पंजाब दे उस ग्रामीण समाज दियां परतां नूँ फोलेया, जो चकाचौंध तों दूर हनेरे विच जी रेहा सी। गुरदयाल सिंह पंजाबी साहित्य दे अजेहे महान हस्ताख़र हन जिन्हां ने पंजाबी नावल नूँ रोमान्सवाद अते आदर्शवाद विचों कड्ढ के यथार्थवाद दे रूबरू कीता। उन्हां दा साहित्यक सफ़र इक अजेही पगडंडी है जो पिंडां दियां रूड़ियां, छप्पड़ां अते खेतां दियां वट्टां विचों हुंदी होयी विश्व साहित्य दे मुख मार्ग तक पहुँची।
गुरदयाल सिंह दा जन्म 10 जनवरी 1933 नूँ पंजाब दे मालवा क्षेत्र दे ज़िला फ़रीदकोट दे ऐतिहासिक कस्बे जैतो विच होया। उन्हां दे पिता सरदार जगत सिंह इक साधारण तरखाण सन। गुरदयाल सिंह दा बचपन बहुत ही ग़रीबी अते तंगियां विच बीतेया। घर दी आर्थिक हालत इन्नी नाज़ुक सी कि उन्हां नूँ अठवीं जमात तों बाद पढ़ाई छड्डणी पयी।
किशोर उम्र विच ही उन्हां ने अपणे पिता नाल लकड़ी दा काम्म (बढ़ई) करणा शुरू कर दित्ता। आरी चलौणी, कुल्हाड़ी नाल लकड़ियां चीरनीयां अते खेतीबाड़ी दे संद बणौणे उहनां दे रोज़ाना जीवन दा हिस्सा बण गये। पर उन्हां दे अंदर इक जिज्ञासू पाठक अते लेखक छुपेया होया सी। उन्हां ने हिम्मत नहीं हारी अते प्राईवेट तौर ते पढ़ाई जारी रखी। मैट्रिक, ज्ञानी अते फेर पंजाबी विच एम.ए. करके इक प्राइमरी स्कूल अध्यापक बणे अते अंत विच पंजाबी यूनिवर्सिटी, पटियाला विच प्रोफ़ेसर दे औहदे तक पहुँचे।
गुरदयाल सिंह दी शख़्सीयत विच बणावटीपण दी कोई थां नहीं सी। गुरदयाल सिंह दी शख़्सियत दी सब तों वड्डी खूबी उन्हां दी ज़मीन नाल जुड़ी सोच सी। उन्हां ने कदे वी महलां दियां कहाणियां नहीं लिखियां, सगों आम आदमी नूँ अपणा नायक बणाया। ज्ञानपीठ पुरस्कार अते पद्म श्री वरगे वड्डे सम्मान मिलण दे बावजूद उन्हां दे सुभाव विच रत्ती भर वी हंकार नहीं आया।
उहनां ने कदे वी अपणे मज़दूर पिछोकड़ नूँ नहीं लुकाया। गुरदयाल सिंह माण नाल कहंदे सन कि जिस ने हत्थीं काम्म नहीं कीता, ओह किरती वर्ग दे दर्द नूँ नहीं समझ सकदा।
गुरदयाल सिंह ने पंजाबी दी ‘मालवई’ उप-बोली नूँ साहित्यिक माण-सतकार दित्ता। उन्हां दी शख़्सियत विच मालवे दी मिट्टी दी महक, उत्थों दे लोकां दा अणखी सुभा अते सादगी साफ़ झलकदी सी।
गुरदयाल सिंह इक अजेहे लेखक सन जो ग़रीबी नूँ रोमांचित नहीं करदे सन, सगों उस दी भयानक ता अते उस विच पिस रहे मनुख दी मानसिकता नूँ बयान करदे सन।
1964 विच प्रकाशित ‘मढ़ी दा दीवा’ पंजाबी नावलकारी विच इक अजेहा मील पत्थर है जिस ने पंजाबी साहित्य नूँ विश्व पदर ते पछाण दित्ती। इस नावल ने उन्हां लोकां नूँ नायक बणाया जो समाज दे सब तों हेठले पाएदार ते खडे सन।
नावल दी कहाणी मालवा दे इक पिंड दी है। इस दा केंद्रीय पात्र जगसीर है, जो इक सीरी यानी खेत मज़दूर है। उस दा पिता ‘धौला’ सारी उमर जट्ट ज़मींदार धरम सिंह दे घर काम्म करदा रेहा अते हुण जगसीर वी ओही काम्म कर रेहा है। जगसीर इक अति दा शरीफ़, इमानदार अते अणखी बंदा है। ओह अपणी उम्रदराज़ माँ ‘नंदी’ नाल इक छोटे जेहे कच्चे कोठे विच रहंदा है।
इस नावल दा सब तों ख़ूबसूरत पक्ख धरम सिंह अते जगसीर दा रिश्ता है। एह रिश्ता सिर्फ़ मालिक अते नौकर दा नहीं है। धरम सिंह जगसीर नूँ अपने छोटे भाई वांग समझदा है। ओह उस दी इज़्ज़त करदा है अते उस दे दुक्ख-सुक्ख विच खड़दा है। पर एह रिश्ता पुराणे समय दियां कदरां-कीमतां ते टिकेया होया है। जदों धरम सिंह दा पुत्तर ‘भंता’ घर दी कमान संभालदा है, तां ओह जगसीर नूँ सिर्फ़ इक कामा यानी काम्मगार समझदा है। एथों ही पुराणे रिश्तेयां दा पतन शुरू हुंदा है।
जगसीर अते भाणी दा प्रेम पंजाबी साहित्य दे सब तों पवित्र अते दर्दनाक अध्यायां विचों इक है। भाणी पिंड दे ही निक्के नाम दे व्यक्ति दी पत्नी है। उन्हां दे रिश्ते विच कोई जिस्मानी खिच नहीं, सगों दोवां दे दुक्खां दी सांझ है। जगसीर इकल्ला है अते भाणी उस दे इकल्लेपण नूँ समझदी है। ओह कदे वी सामाजिक मर्यादावां नहीं उलंघदे, पर उन्हां दियां ख़ामोश नज़रां सब कुज बयान कर देंदिया हन। जदों जगसीर बीमार हुंदा है, तां भाणी ही उस दा सहारा बणदी है।
नावल दा नाम बहुत डूंगे अर्थ रखदा है। जगसीर दे प्यो धौले दी मढ़ी यानी समाधि, धरम सिंह दे खेत विच बणी होयी है। जगसीर चौंहदा है कि ओह उस मढ़ी नूँ पक्की करवाये, पर उस कोल ना अपणी ज़मीन है अते ना ही साधन। जदों भंता उस मढ़ी कोलों टाहली दा रुक्ख वड्डण दी कोशिश करदा है, तां जगसीर नूँ अपणी होंद ख़तरे विच लगदी है। ‘मढ़ी’ अतीत अते जड़ां दा प्रतीक है, जदों कि ‘दीवा’ वंश अते आस दा। जगसीर दा कोई पुत्तर नहीं है, इस लई उस दी मढ़ी ते दीवा जगौण वाला कोई नहीं बचेगा।
गुरदयाल सिंह ने विखाया है कि ग़रीबी सिर्फ़ पैसे दी कमी नहीं, सगों मनुख दी आत्मा नूँ कुचलन वाली शक्त्ती है। जगसीर दी ज़िंदगी- कर्ज़े, जगीरदारी सोच अते ज़ात-पात दी भेट चढ़ जांदी है। अंत विच जगसीर दी मौत इक व्यक्ति दी मौत नहीं, सगों पूरी मानवता दी हार है।
गुरदयाल सिंह दे साहित्य ने पंजाबी नूँ दुनिया दे नक्शे ते उभारेया। इसलयी उन्हां नूँ 1999 विच भारतीय साहित्य दा सर्वाेच सनमान ज्ञानपीठ पुरस्कार नवाज़ेया गया। इस तों पहलां 1975 विच गुरदयाल सिंह नूँ नावल श्अध चानणी रातश् लयी साहित्य अकादमी पुरस्कार अते 1998 विच गुरदयाल सिंह नूँ भारत सरकार वल्लों पद्म श्री सनमान नाल नवाज़ेया गया।
16 अगस्त 2016 नूँ ने इस संसार नूँ अलविदा कह जाण वाले गुरदयाल सिंह इक अजेहे लेखक सन जिन्हां ने लिखेया ही नहीं, सगों साहित्य नूँ अपणी ज़िदग़ी विच उतारेया। उन्हां दी शख़्सीयत विच इमानदारी, किरत दा सतकार अते अणख वरगियां ओह सारियां कदरां-कीमतां सन जो उन्हां दे किरदारां विच मिलदियां हन।
गुरदयाल सिंह दा मशहूर नावल ‘मढ़ी दा दीवा’ पंजाबी पेंडू जीवन दा इक अजेहा शाहकार है जो औण वालीयां कई पीढ़ियां नूँ प्रेरित करदा रहेगा। एह नावल सानूँ याद दुऔंदा है कि समाज दी तरक्की उदों ही सार्थक है जेकर ‘जगसीर’ वरगे इंसानां दे जीवन विच वी इंसाफ़ अते सतकार दा दीवा जग सके।
-लेखक लोकप्रिय शायर और आकाशवाणी के पूर्व वरिष्ठ उद्घोषक हैं
About the Author
