सुण चरखे दी मिठी-मिठी कूक

राजेश चड्ढ़ा
पंजाबी जन-जीवन अते पेंडू सभ्याचार विच ‘चरखा’ सदियां तों इक घरेलु वस्तु दे तौर ते मौजूद रेहा है। पर जदों एहो चरखा पंजाब दे सूफ़ी दरवेशां, फ़क़ीरां अते संतां दे कलाम विच प्रवेश करदा है, तां लक्कड़ दा साधारण संद नहीं रहंदा, सगों आत्म-चिंतन, रूहानी साधना अते प्रेम दा सब तों डूंघा प्रतीक बण जांदा है। सूफ़ी संतां ने आम लोकां नूं रूहानियत दा सबक़ देण लई किसे औखे किताबी दर्शन दा सहारा नहीं लेआ, बल्कि उन्हां दे रोज़ाना जीवन विच खड़कदे चरखे, उसदी माल, तकले, घूकर अते त्रिंजण नूं ही ज्ञान दा ज़रिआ बणा दिता।
चरखा कतन दा अमल असल विच अपणे साहिब लई दाज तैयार करण दा सफ़र है। पंजाब दे सूफ़ी शायरां ने चरखे नूं जिस काव्य-कला अते रूहानी रम्ज़ नाल वरतेआ है, उह समूची दुनिया दे साहित्य विच अतुलनीय है।
सूफ़ी विचार-धारा अनुसार मनुक्खी शरीर ही चरखा है। जिस तरहां इक चरखे दे वक्ख-वक्ख पुर्ज़े हुंदे हन अते उन्हां दे तालमेल नाल ही सूत कतेआ जांदा है, उवें ही मनुक्खी शरीर दे अंग, स्वास अते सुरत मिल के, नाम-सिमरन रूपी सूत कतदे हन। एत्थे चरखे दा ढांचा मनुक्खी देह है। कत्तणहारी जीव-आत्मा है, जो अपणे एस नश्वर संसार विच बैठी है।
पूणी सांसारिक कर्म अते रब्ब वल्लों दिते गए सुआस हन। सूत नेक अमाल, नाम-सिमरन अते रूहानी कमाई है। तकला मन दी एकाग्रता अते सिमरन दी सुई है। जे तकला वल खा जावे, तां सूत टुट जांदा है। एसे तरहां जे मन विच विकार आ जावे, तां साधना भंग हो जांदी है। माल यानी धागा प्रेम अते अक़ीदत है, जो मुरशिद नाल जुड़ेया है। घूकर यानी चरखे दी आवाज़ दिल दी धड़कन विच चलदा रब्बी ज़िक्र है। दाज रूहानी नेकी है जिसनूं लै के रूह ने अपने असल घर यानी परमात्मा दे दर ते जाणा है। त्रिंजण एह संसार है जित्थे बहुत सारिआं सखीआं यानी आत्मावां इकट्ठिआं बैठ के अपणी-अपणी उम्र रूपी पूणी कत रहिआं हन। पंजाबी सूफ़ी काव्य दे पितामह बाबा फ़रीद आखदे हन-
साहे लिखे न चलै जिंदू कूं समझाए॥
अज कालै जिन्दु डुबली कुड़ीएं किउं न कतै॥
यानी मौत दा दिन तां मुक़र्रर है, फेर भोली आत्मा तूं बे-फ़िक्री विच क्यों बैठी हैं? तूं अपने अमलां दा सूत क्यों नहीं कत रही? जे पेके घर कुज ना खटेआ, तां सोहरे घर जाके मुंह किवें दिखावेंगी?
चरखे नूं सूफ़ी साधना दा केंद्रीय धुरी बणौण वाले शाह हुसैन आखदे हन-
चरखा मेरा नौ लखा कत्तण वाली वल।
अट्ठ पवेले नौ चामड़ियां, चहुं खूंटां वल चल॥
कहे हुसैन फ़क़ीर निमाणा, ताना ताणियां गल।
सभ किसे कूं कातणा, आपो अपनी वल॥
शाह हुसैन दे मुताबिक नौ लखा चरखा असल विच नौ द्वारां वाला मनुक्खी शरीर है, जिसदी क़ीमत अमोलक है। पर इसनूं कत्तण वाली आत्मा अज्ञानता विच वल खा रही है यानी त्रुटिआं कर रही है। शाह हुसैन समझौंदे हन कि हर इंसान नूं अपणी उम्र रूपी तंद ख़ुद ही कत्तनी पैणी है, कोई दूजा किसे दा भार नहीं चुक्क सकदा। अपणी इक काफ़ी विच शाह हुसैन कहंदे हन-
घूंघट चुक्क ओ सजणा, हुण नैण मिलांदे लाज किहा?
चरखा मेरा रंग-रंगायला, माल पिआली लाल।
कहे हुसैन फ़क़ीर साईं दा, जिवें भावें तिवें पाल॥
एत्थे चरखा सिर्फ़ कर्म नहीं, सगों प्रेम दा रंग-मंच है। जदों रूह अपणे यार दे प्रेम विच रंगी जांदी है, तां चरखे दी माल वी रूहानी लाल रंग विच रंगी जांदी है।
बुल्ले शाह दी इक मशहूर काफ़ी चरखे दी लय नूं सांस-सांस दे सिमरन नाल जोड़दी है-
चरखे दी घूं-घूं सुण के, मैनूं पिआ हिज्र दा तीर।
हाए कत्तदी दा तकला वल खांदा, रोवे रांझे दी हीर॥
एत्थे चरखे दी आवाज़ विछोड़े दा तीर बण जांदी है। कत्तदी होई कत्तणहारी जदों अपने माशूक़ नूं याद करदी है, तां उसदा ‘हू’ यानी परम सत्ता सांसारिक बंधनां नूं साड़ के स्वाह कर दिंदा है।
सुल्तान बाहू ने भले ही ‘हू’ दे ज़िक्र नूं प्रधान रखेआ है, पर उन्हां दे चरखे दी तंद अहंकार नूं नकार के रब्ब नूं स्वीकार करण नाल जुड़ी होई है-
दिल काले तों मुंह काला चंगा, जे कोई उस नूं जाणे हू।
चरखा कात पियारे दा, जे कोई रम्ज़ पछाणे हू॥
अंदर बूटी मुश्क मचाया, कत्तदी उम्र विहाणी हू।
कामिल मुरशिद ऐसा मिलिया, तंद ना टुटण दाणी हू॥
सुल्तान बाहू समझौंदे हन कि सच्चा कामिल मुरशिद उहो है, जो चरखे ते अजेही माल चढ़ा देवे कि नाम दी तंद कदे टूटे ही ना। जदों सिमरन दा सूत मुकम्मल हो जांदा है, तां दिल दे अंदर रूहानी कस्तूरी महक उठदी है।
ग़ुलाम फ़रीद ने चरखे नूं विरहा दी चरम सीमा ते पुहंचा दित्ता-
सुण चरखे दी मिठी-मिठी कूक, माहिया मैनूं याद आंवदा।
मेरे दिल विचों उठदी ऐ हूक, माहिया मैनूं याद आंवदा॥
गुलाम फ़रीद लई चरखे दी कूक सिर्फ़ सुर नहीं, सगों दिल दी उह हूक है जो परमात्मा दे विरह विचों उपजी है। हर चक्कर नाल महबूब दी याद ताज़ा हुंदी है अते विछोड़े दी अग्नि भड़कदी है।
अज्ज दा युग प्लास्टिक, कंप्यूटरां, तेज़-रफ़्तार इंटरनेट अते अंधी दौड़ दा युग है। चरखा साडे घरां विचों अलोप हो के अजायबघरां दी शोभा बण चुकेया है। पर सवाल पैदा हुंदा है, की चरखे दा सूफ़ी फ़लसफ़ा वी अलोप हो गया है?
नहीं, चरखे दा संदेश अज्ज दे तनाव-ग्रस्त अते भटके हुए मनुष्य लई सदियां नालों वी वद्ध प्रासंगिक है। चरखा कतना वी इक मैडिटेशन है। चरखा सानूं हौली-हौली, सहजता नाल जीवन ज्यौण दा सबक़ दिंदा है।
सूफ़ी दरवेशां ने दुनिया छड्ड के जंगलां विच जाण दा उपदेश नहीं दिता। चरखा गृहस्थ विच रहके साधना करण दा आदर्श नमूना है। एसे करके केहा जांदा है कि हत्थ कार यानी कम्म वल्ल अते दिल यार वल्ल।
-लेखक जाने-माने शायर और आकाशवाणी के पूर्व वरिष्ठ उद्घोषक हैं