राजेश चड्ढ़ा
पंजाब दी धरती पंजों पाणियां दी ही नहीं, सगों पंजों पीरां अते अनेक सूफ़ी दरवेशां दी धरती है। इस धरती दी आबो-हवा विच कुज अजेहे शब्द रचे-बसे होये हन, जो सदियां तों मनुख नूं रब्ब दे नज़दीक लै जाण दा ज़रिया बणे होये हन। अजेहा ही इक पवित्र शब्द है श्साईंश्। एह महज़ इक संबोधन नहीं है, सगों एह इक यकीन, इक समर्पण अते इक अजेही पुकार है जो मुर्शद तों हुंदी होई सिधी रब्ब तक पहुंचदी है।
साईं शब्द दी जड़ कित्थे है, इस बारे विद्वानां दे वखो-वख मत हन। एह शब्द भाषाई सांझ दी इक बहोत ही खूबसूरत मिसाल पेश करदा है।
फ़ारसी दे मुताबिक शाह शब्द दा अर्थ राजा या मालक दस्सेया गया है। यानी अजेहा राजा जो असल विच धार्मिक फकीर होवे या फेर जेड़ा रब्ब दे नेड़े होवे। सूफ़ीवाद विच दुनियावी मालकां दी बजाए अध्यात्मिक रहबरां नूं शाह केहा जाण लगा जिवें बुल्हे शाह, वारिस शाह। एही शाह शब्द वक्त दे नाल बदलदा होया अते लोक-मुहार विच ढलदा होया साईं बण गया।
भारतीय भाषा विज्ञान दे नज़रिए तों, साईं शब्द दा संबध संस्कृत दे शब्द स्वामी नाल वी जोड़ेया जांदा है। स्वामी दा अर्थ है मालक या प्रभू।
पंजाबी लोक-जीवन विच साईं शब्द इक गहरी श्रद्धा दा प्रतीक है। इसदी वरतों पंजाबी समाज विच तिन मुख पदरां ते हुंदी आयी है।
धार्मिक अते अध्यात्मिक पदर ते पंजाबी विच दरवेशां अते फ़कीरां नूं स़ाईं लोकी केहा जांदा है। इसदा अर्थ है अजेहे लोक जिन्हां दा इस संसार नाल कोई मोह नहीं अते जो सिर्फ़ अपणे साईं या अपणे रब्ब दे रंग विच रंगे होये हन।
सामाजिक सत्कार दे पासेयों देखेया जावे तां पुराणे पंजाबी समाज विच औरतां अपणे पती नूं साईंश् कह के संबोधित करदीयां सन, जो कि स्वामी या मालक दे अर्थां विच सी। एह शब्द घर दे मुखिया लयी सत्कार दा चिन्ह सी।
पंजाबी दी सब तों सौहणी असीस है-साईं वसे या साईं जीवे। एह दर्शाैंदा है कि साईं शब्द पंजाबियां दे साहां विच वसेया होया है।
पंजाबी सूफ़ी कविता विच साईं शब्द नूं जो उँचाई मिली है, ओह किसे होर भाषा विच दुर्लभ है। सूफ़ी कवियां लयी साईं कदे मुर्शद यानी गुरु बण के औंदा है अते कदे खुद खुदा बण के औंदा है।
बुल्हे शाह लयी साईं अजेहा है जेड़ा हर पासे दिसदा है। एस वजहों बुल्लेशाह कहंदे हन-
ना हुण दूरी,ना हुण ओले
साईं मेरे अंदर बैठा बोले।
सूफ़ी गायकी विच साईं शब्द नूं जदों लंबी हेक नाल गौण वाला गांदा है, तां एस तरहां लगदा है जिवें रूह दी तड़प नूं बयान कर रेहा होवे। शाह हुसैन अपणियां काफ़ियां विच साईं नूं अपणा मालक मन्न के अपणी हस्ती नूं मिटा देण दी गल्ल करदे हन। उन्हां लयी साईं दे रंग विच रंगेया जाणा ही असल जीवन है। शाह हुसैन कहंदे हन कि रूहानी राह ते चलदेयां मेरा जीवन खुशियां नाल नहीं, बल्कि दुक्खां नाल भरेया होया है। जिवें शरीर नूं रोटी दी ज़रूरत हुंदी है, ओसे तरहां विछोड़े दे दुक्ख मेरी रूह दी खुराक बण गए हन। शाह हुसैन आखदे हन-
दुक्खां दी रोटी, सूलां दा सालण, आहीं दा बालण बाल
कहे हुसैन फ़कीर सांईं दा, शहु मिले तां थीवां निहाल
सांईं शब्द दी पवित्रता दा अंदाज़ा इस गल्ल तों वी लगाया जा सकदा है कि श्री गुरु ग्रंथ साहिब जी विच भगतां अते गुरु साहिबान ने इस शब्द दी वरतों बहोत ही प्यार नाल कीती है। बाबा फ़रीद जी दी बाणी विच साईं शब्द परमात्मा लयी वरतेया गया है-
साईं मेरु सिदकु राखि
मुखु दुनीआ नो न देखालि
बाबा फ़रीद कहण दा भाव है कि हे मेरे साईं! मेरा तेरे ते भरोसा कायम रख ताकि मैनूं दुनिया दे झूठे मान-सम्मान वल्ल देखण दी ज़रूरत ना पवे।
अज्ज दे दौर विच वी सांईं शब्द दी खिच्च घट्ट नहीं होयी। चाहे ओह नुसरत फ़तह अली ख़ान दियां कव्वालियां होण या गुरदास मान दी गायकी, साईं शब्द अज्ज वी नौजवान पीढ़ी नूं उस अध्यात्मिक सकून नाल जोड़दा है जिसदी तलाश हर मनुख नूं है। सूफ़ियाना साहित्य विच इस शब्द दी वरतों एह सिखौंदी है कि मनुख भांवें किन्ना वी वड्डा क्यों ना हो जावे, उस नूं किसे साईं या मालक दे दर ते झुकणा ही पैंदा है।
नतीजन एह केहा जा सकदा है कि साईं शब्द दी उत्पत्ति भांवें फ़ारसी दे शाह या संस्कृत दे स्वामी तों होयी होवे, पर इसनूं असल अर्थ पंजाब दी सूफ़ियाना रवायत ने दित्ते हन। एह शब्द ज़ातां, धर्मां अते सरहदां तों परे है। एह इक अजेहा पुल है जो बंदे नूं बंदे नाल जोड़दा होया बंदे नूं रब्ब नाल जोड़दा है। पंजाबी साहित्य विच साईं महज़ इक अक्खर नहीं, सगों संपूर्ण रूहानी फ़लसफ़ा है। एह निम्रता अते इश्क़-ए-हकीकी दा सिखर है। बाबा बुल्लेशाह आखदे हन-
जिस दा साईं होवे वल्ल
उस नूं कदे ना आवे झल्ल
-लेखक सुविख्यात शायर और आकाशवाणी के पूर्व वरिष्ठ उद्घोषक हैं
About the Author
