इश्क़ हक़ीक़ी

राजेश चड्ढ़ा
पंजाबी साहित्य दा इतिहास सूफ़ी दरवेशां दी रूहानी खुशबू नाल रचेया-मिचेया होया है। सूफ़ीवाद विच इश्क़ महज़ इक शब्द नहीं, सगों इक मुकम्मल इबादत है। सूफ़ी कवि संसारिक मोह-माया नूँ छड्ड के उस अकाल-पुरख या रब्ब नाल लौ लौण नूँ ही जीवन दा असल मक़सद मनदे हन। पंजाबी सूफ़ी कविता विच इश्क़ दे दो रूप हन। इक तां इश्क़ मजाज़ी यानी संसारिक प्रेम अते दूजा इश्क़ हक़ीक़ी यानी रूहानी प्रेम। सूफ़ी चिंतन अनुसार इश्क़ मजाज़ी असल विच इश्क़ हक़ीक़ी तक पहुँचण दा इक ज़रिया है।
सूफ़ी परमातमा या माशूक या प्रेमी है अते इन्सानी रूह आशिक़ है। इश्क़ हक़ीक़ी दा मतलब है, अपणी हस्ती या अहंकार नूँ मिटा के उस माशूक विच लीन हो जाणा। इस अवस्था नूँ सूफ़ियां ने फ़ना केहा है। जदों आशिक़ अते माशूक विच कोई दूरी नहीं रह जांदी, तां ओह अमरता प्राप्त कर लैंदे हन।
पंजाबी सूफ़ी काविता दे पितामाह बाबा फ़रीद ने इश्क़ हक़ीक़ी दी नींव बिरहा यानी जुदाई दे दर्द ते रखी है। उन्हां अनुसार जिस दिल विच रब्ब दा दर्द नहीं, ओह दिल कब्र समान है। बाबा फ़रीद आखदे हन-
बिरहा बिरहा आखीऐ
बिरहा तू सुल्तानु
फ़रीदा जितु तनि बिरहु न ऊपजै
सो तनु जाणु मसानु
फ़रीद फ़रमौंदे हन कि लोग बिरहा या जुदाई नूँ बुरा कहंदे हन, पर मेरे लयी बिरहा इक राजा यानी सुल्तान है। जिस शरीर विच सजण दे मिलाप दी तड़प पैदा नहीं हुंदी, ओह शरीर मरघट वरगा है। बाबा फ़रीद दे इश्क़ दा मुढ जुदाई दे अहसास तों शुरू हुंदा है।
शाह हुसैन ने इश्क़ हक़ीक़ी नूँ नम्रता अते सेवा नाल जोड़ेया है । उन्हां दे मुताबिक जदों तक मैं यानी अहंकार ज़िन्दा है, उदों तक यार नहीं मिल सकदा। शाह हुसैन आखदे हन-
कहे हुसैन फ़कीर साईं दा
मैं नाहीं सब तू
तूहीं दाणा तूहीं ताणा
सभु किछु मेरा तू
यानी मेरे सजणा मेरा अपना कोई वजूद नहीं है, हर जगह सिर्फ तूं ही हैं। तूं ही ताणा है अते तू ही बाणा हैं। यानी पूरी कायनात तेरा ही रूप है। एही इश्क़ हक़ीक़ी दी चरम अवस्था है जित्थे आशिक़ अपनी पहचान नूँ पूरी तरहां मिटा दिंदा है।
बुल्लेशाह दे कलाम विच इश्क़ हक़ीक़ी अपणे पूरे शबाब विच नज़र औंदा है। उन्हां ने धार्मिक कट्टरपंथ अते पाखंड नूँ ठुकरा के सिर्फ इश्क़ नूँ ही रब्ब तक पहुँचण दा राह दस्सेया है। बुल्लेशाह कहंदे हन-
इश्क़ दी नवियों नवी बहार
बेद कुरानां पढ़ पढ़ थक्के
सजदे करदयां घस गए मत्थे
न रब्ब तीरथ न रब्ब मक्के, जिस पाया तिस नूर अनवार
यानी के इश्क़ दी बहार हमेशा नवीं रहंदी है। परमात्मा कित्थे बाहर मक्के या तीरथां ते नहीं वसदा, सगों ओह तां प्रेमी दे दिल विच नूर बण के चमकदा है। उन्हां लयी इश्क़ हक़ीक़ी ही असली इल्म यानी ज्ञान है।
गुलाम फ़रीद दी नज़र विच इश्क़ हक़ीक़ी रोही यानी मरुथल दे विम्ब राहीं प्रगट हुंदा है। उन्हां ने इन्सानी रूह नूँ सस्सी या हीर वजहों पेश कीता है, जो अपणे यार लयी भटक रही है। ग़ुलाम फ़रीद आखदे हन-
असां ते असाडा पिआरा राँझण
हुण थिआ शोर चकोर
अंदर बाहर हिकौ राँझण
जित्त ड़ेखां उत डोर
गुलाम फ़रीद दा कहणा है कि हुण मेरे लयी मेरा यार अते मैं इक ही हो गए हां। जिवें चकोर चन्न नूँ वेखदा है, उस्से तरहां मैं हर पासे अपणे राँझण नूँ ही वेखदा हां। हुण साडे विचकार कोई दूरी नहीं रही।
सूफ़ी कवियां ने हीर-रांझा, सस्सी-पुन्नूं अते सोहनी-महिवाल वरगियां लोक-गाथावां नूँ इश्क़ हक़ीक़ी दे प्रतीकां वजहों वरतेया है। एत्थे रांझा या पुन्नूं परमात्मा है अते हीर या सस्सी इन्सानी रूह हन। सूफ़ियां ने मुर्शद यानी गुरू, मना यानी प्रेम दा नशा अते बंदगी वरगे शब्दां नूँ रूहानी अर्थ दित्ते। सूफ़ियां ने इश्क़ हक़ीक़ी दा संकल्प जात-पात अते मजहब तों उच्चा दस्सेया है। एही वजह है कि सूफ़ी साहित्य ने हमेशा दिलां नूँ जोड़न दी गल कीती है। पंजाबी सूफ़ी कविता विच इश्क़ हक़ीक़ी महज़ इक विषय नहीं, सग्गों इक जीवण-जाच है। एह सानूँ सिखौंदी है कि परमात्मा नूँ पौण लयी किते बाहर जाण दी लोड़ नहीं, सगों अपणे अंदरों मैं नूँ मिटा के प्यार दा दीवा जगौण दी लोड़ है। बाबा फ़रीद तों लै के गुलाम फ़रीद तक, हर सूफ़ी दरवेश ने इश्क़ नूँ ही सब तों वड्डा धर्म मनेया है।
अज्ज दे दौर विच, जदों समाज नफ़रत अते हिंसा वल वध रेहा है, सूफ़ी कवियां दा एह इश्क़ हक़ीक़ी दा सुनेहा सानूँ मुड़ इन्सानियत नाल जोड़ सकदा है।
-लेखक जाने-माने शायर और आकाशवाणी के पूर्व वरिष्ठ उद्घोषक हैं