फाटक कोट कपूरे दा

राजेश चड्ढ़ा
पंजाबी संगीत दा इतिहास, रूह दी आवाज़ तों लैके रंगा-रंग विरासत तक फैलेया होया है। पंजाबी संगीत सिर्फ सुर ते ताल दा सुमेल नहीं है, सगों एह पंजाब दी मिट्टी, इत्थों दे लोकां दे चावां, दुक्खां-सुक्खां अते ऐतिहासिक तब्दीलियां दी इक ज्यौंदी-जागदी तस्वीर है। जेकर असीं पंजाबी संगीत दे इतिहास वल नज़र मारिये, तां एह सफर बाबा फ़रीद दी बाणी, बुल्ले शाह दियाँ काफ़ियां अते वारिस शाह दी हीर तों शुरू हुंदा होया आज दे आधुनिक पंजाबी संगीत तक पहुंच गया है।
पंजाब दी रूह विच संगीत इस कदर रचेया होया है कि एत्थे जन्म तों लै के मरण तक, हर मौके दे अपणे गीत हन। सुहाग, घोड़ियां, टप्पे ते बोलियां नाल सजेया पंजाबी लोक-संगीत साडे सभ्याचार दी नींव है। पर जिवें-जिवें समां बदलेया, पंजाबी संगीत विच दोगाणा गायकी दा दौर आया, जिसने पंजाबी संगीत नूँ घर-घर तक पहुँचा दिता। इस सुनहरी दौर दे इक चमकदे सितारे सन-दीदार संधू।
दीदार संधू सिर्फ इक गायक ही नहीं सन, बल्कि इक अजेहे महान गीतकार सन जिन्हां ने पंजाबी बोली नूँ नवें अक्खर ते नवें मुहावरे दिते। दीदार संधू दी लेखनी विच व्यंग्य, जज्बात ते हकीकत दा इक अनोखा सुमेल सी। उन्हां दे गीत किसे कल्पना दी उड़ान नहीं, बल्कि आम लोकां दी जिंदगी दी सच्ची दास्तान हुंदे सन। उन्हां दी गायकी विच इक अजेही खिच्च सी जो सिद्धा कालजे नूँ धूँह पांदी सी।
दीदार संधू दे लिखे अते गाए अनगिनत गीत आज भी पंजाबी संगीत दे इतिहास विच मील पत्थर हन, पर जेहड़ी मकबूलियत-बन्द पया दरवाजा ज्यूँ फाटक कोट कपूरे दा, गीत नूँ मिली, ओसदी कोई दूजी मिसाल नहीं है। एह गीत सिर्फ इक आशिक दी तड़प दी कहाणी नहीं है, बल्कि इक सामाजिक समस्या नूँ रचनात्मक रूप विच पेश करण दा इक बेहतरीन नमूना है।
पंजाब दे फरीदकोट जिले दा मशहूर शहर है-कोट कपूरा। एस शहर दे विचों गुजरदी रेलवे लाइन ते मौजूद फाटक, कदे एत्थों दे लोकां लयी जी दा जंजाल बणेया होया सी। भठिंडा-फिरोजपुर रेलवे लाइन ते होण करके एह फाटक दिन विच कई-कई वार बंद हुंदा सी। कदे मालगड्डी ते कदे सवारी गड्डी, लोकां नूँ कई-कई घंटे उडीक करनी पैंदी सी। दीदार संधू साहिब, जो अक्सर अपणे प्रोग्राम दे सिलसिले विच पंजाब दे वख-वख कोनेयां विच जांदे रहंदे सन, उन्हां नूँ खुद कई वार एस फाटक दी मार सहणी पयी। कहंदे हन कि इक वार संधू साहिब नूँ किसे प्रोग्राम ते पहुँचण लयी देर हो रही सी, पर कोट कपूरे दा फाटक बंद होण करके उन्हां दी गड्डी ओत्थे ही रुक गई। उस तड़प, उस बेबसी अते लोकां दे चेहरे दी परेशानी नूँ देख के संधू साहिब दा संवेदनशील मन बहुत दुखी होया। संधू साहिब ने उस रुकावट नूँ अपनी लेखनी दा विषय बणाया। उन्हां ने उस बंद फाटक दी तुलना इक प्रेमिका दे बंद दरवाजे नाल कर दिती। जिवें इक प्रेमी अपनी प्रेमिका नूँ मिलण लयी बेताब हुंदा है, पर बंद दरवाजा उसदे राह विच रोड़ा बण जांदा है, एसे तरहां कोट कपूरे दा फाटक लोकां दी मंजिल दे राह विच रुकावट सी।
इस गीत नूँ दीदार संधू ने न सिर्फ लिखेया, सगों अपणी आवाज़ नाल शृंगारेया वी। उन्हां दा साथ दिता उस समय दी उभरदी हुई ते बेहद सुरीली गायिका अमर नूरी ने। संधू साहिब ते अमर नूरी दी जोड़ी ने इस गीत विच रूह फूँक दिती। गीत दे बोल इन्ने सादा अते असरदार सन कि बच्चा-बच्चा इन्हां नूँ गुनगुनौण लग पया। गीत दे संगीत दी जिम्मेदारी चरनजीत आहूजा साहिब ने निभाई। आहूजा जी ने अपनी जादुई उंगलियां नाल अजेहा संगीत तैयार कीता, जिसने इस गीत नूँ सदाबहार बणा दिता।
बन्द पया दरवाजा नी
ज्यूँ फाटक कोट कपूरे दा…
अज्ज वी जदों एह बोल गूंजदे हन, तां सुणन वाले दे अक्खां साहमणे ओही मंजर आ जांदा है। इस गीत विच प्रेमी दी व्याकुलता ते शहर दी ओही हकीकत, दोनों इक-दूजे विच घुल्ल-मिल गईयां हन।
केहा जांदा है कि साहित्य ते संगीत समाज दा शीशा हुंदे हन। एह गीत इन्ना मशहूर होया कि कोट कपूरे दा फाटक पंजाब दी राजनीति ते प्रशासनिक हलकेयां विच चर्चा दा विषय बण गया। लोक जदों वी उस फाटक ते रुकदे, उन्हां दे मुँह ते दीदार संधू दा एह गीत हुंदा सी। एह गीत लोकां दी आवाज़ बण गया।
हौले-हौले सरकार नूँ अहसास होया कि एह समस्या किन्नी गंभीर है। अखीरकार, लोकां दी सुविधा लयी उस जगह ते इक ओवरब्रिज बणा दिता गया। अज्ज कोट कपूरे दा फाटक तां नहीं रेहा, पर एह गीत अज्ज वी लोकां दे दिलां विच जिन्दा है। हर वार जदों कोई उस पुल तों गुजरदा है, उसनूँ दीदार संधू दी आवाज़ याद आ जांदी है।
जेकर असीं पंजाबी संगीत दी हिस्ट्री विच इस गीत दा मूल्यांकन करिये, तां असीं पावांगे कि एह गीत यथार्थवाद दा इक वड्डा सुमेल है। आम तौर ते प्रेमी-प्रेमिका दे गीत फुल्लां, तारेयां या महलां दी गल्ल करदे हन, पर दीदार संधू ने इक रेलवे फाटक जहे रुखे विषय नूँ मुहब्बत दे जज्बात नाल जोड़ दिता।
कोट कपूरे दा फाटक.. गीत, सिर्फ इक गीत नहीं, बल्कि इक कलाकार दी संवेदनशीलता अते आम आदमी दे दर्द दी साझी दास्तान है। दीदार संधू अज्ज साडे विच नहीं हन, पर उन्हां दे गीत अज्ज वी साडे सभ्याचार दा अटूट हिस्सा हन। एह गीत सानूँ याद दुऔंदा है कि इक सच्चा कलाकार ही लोकां दी परेशानी नूँ समझदा है अते गीत संगीत दे ज़रिये अपणी कला राहीं उसनूँ अमर कर दिंदा है।
-लेखक सुविख्यात शायर और आकाशवाणी के पूर्व वरिष्ठ उद्घोषक हैं