मिट्टी दी खुशबू: गुआचदे रिश्तेआं दी मरदी भाषा

राजेश चड्ढ़ा
मनुक्खी सभ्याचार दे इतिहास विच रिश्ते-नाते सिर्फ़ ख़ून दे जैविक संबध नहीं हुंदे, बल्कि एह किसे समाज दी नैतिकता, सामाजिक ज़िम्मेवारी, मानसिक सुरक्षा अते भावात्मक सांझ दा ताना-बाना हुंदे हन। संसार दी हर विकसित भाषा अपणे समाज दे पारिवारिक ढांचे अनुसार रिश्तेआं दे नां घड़दी है। जिस समाज विच रिश्ते जिन्ने वध संगणे, बहु-परती अते आत्मीय होणगे, उस समाज दी भाषा विच उन्हां रिश्तेआं नूं परिभाषित करण वाले लफ़्ज़ वी ओने ही बारीक, सजीव अते वखरे होणगे। पंजाबी बोली रिश्तेदारी दे मामले विच दुनिया दिआं सब तों धनी, संवेदनशील अते बारीक बोलियां विचों इक है।
इक वेला सी जदों पंजाबी समाज विच परिवार सिर्फ़ मां-प्यो अते बच्चे तक सीमित नहीं सी, बल्कि एह नानके, दादके, पेके, सोहरे, पेके-पिंड अते भाईचारे दे विशाल समुंदर वांग फैलेया होया सी। पर अफ़सोसनाक हक़ीक़त एह है कि अज्ज दा तथाकथित आधुनिक, पश्चिमी अते बाज़ारू युग साडी इस अमीर विरासत नूं निगल रेहा है। अंग्रेज़ी दे दो बे-जान, सपाट अते बे-रंग शब्दां ‘अंकल’ अते ‘कज़न’ ने पंजाबी दे दर्जनां अजेहे रिश्तेआं नूं क़त्ल कर दित्ता है, जिन्हां दे हर लफ़्ज़ विच इक वखरा रस, सत्कार, मज़ाक, लाड अते सामाजिक मर्यादा समाई होई सी।
पंजाबी सभ्याचार विच रिश्ता सिर्फ़ कोई संबोधन नहीं सी, बल्कि एह हक़ अते फ़र्ज़ दा सुमेल सी। पंजाबी ने रिश्ते नूं दो बुनिआदी धारावां विच वंडेआ होया सी- दादका परिवार यानी प्यो दे ख़ून नाल जुड़े रिश्ते, अते नानका परिवार यानी मां दे पेके नाल जुड़े रिश्ते। इन्हां दोहां धारावां दे भावुक संदर्भ बिल्कुल वखरे सन। नानके घर विच लाड, बे-फ़िक्री, ममता अते छूट सी, जदकि दादके घर विच ज़िम्मेवारी, अनुशासन, पैतृक सांझ अते ज़मीन-जायदाद दे रिश्ते सन। पंजाबी भाषा ने इन्हां दोहां परम्परावां लई अजेही शब्दावली सिरजी कि लफ़्ज़ सुणदे ही रिश्ते दा पूरा भूगोल, इतिहास अते मर्यादा अक्खां साहमणे साफ़ हो जांदी सी।
अंग्रेज़ी भाषा विच प्यो दे वड्डे भाई, छोटे भाई, मां दे भाई, मां दे जीजे अते प्यो दे बहनोई-सब लई सिर्फ़ इक्क ही शब्द है ‘अंकल’। एत्थे तक कि रस्ते चलदे अण-पछाते व्यक्ति नूं वी ‘अंकल’ कह दिता जांदा है। पर ज़रा पंजाबी भाषा दी रईसी वेखो, जित्थे हर रिश्ते दी सामाजिक भूमिका अते उसदा भावात्मक भार वखरा सी। ‘ताया’ उह रिशता सी जो प्यो तों वड्डा हुंदा सी। उसदा रुतबा घर दे बुज़ुर्ग छत्र-छां वांग सी, जिसदे साहमणे प्यो वी सिर झुकौंदा सी। ताई घर दी वड्डी स्याणी हुंदी सी, जिसदे हत्थ विच पिंड दिआं सांझां दी कुंजी हुंदी सी। ताया सिर्फ़ प्यो दा भाई नहीं, बल्कि कुल दी पगड़ी दा रक्षक सी।
प्यो दे छोटे भाई नूं श्चाचाश् केहा गया। चाचे नाल भतीजे-भतीजी दा रिश्ता दोस्ताना, बे-तकल्लुफ़ी अते ख़ास लाड दा हुंदा सी। चाचा भतीजे नूं मोढेआं ते चुक्क के मेले दिखौंदा सी, अते चाची नाल निक्की-निक्की शरारत अते मज़ाक जायज़ सी। मां दा भाई ‘मामा’ बणेआ, जिसदे बारे लोक-अखाण है कि ‘मां वरगी देवी ना कोई अते मामे वरगा रिश्ता ना कोई’। मामा, भांजे-भांजी दे जीवन विच उह फ़रिश्ता सी जो व्याह-शादिआं वेले ‘नानके-छक्क’ लै के औंदा सी। मामा कदे सख़्त नहीं हुंदा सी, मामा हमेशा प्यार, सौग़ातां अते ममता दा दूसरा रूप सी।
प्यो दी बहन ‘भुआ’ सी, जिसदे सिर ते वीर अपणी जान वारदा सी। भुआ दा घर औणा, घर विच दीवाली वांग हुंदा सी, अते उसदा पती ‘फुफ्फड़’ जिसदा पंजाबी व्याहां विच रुस्सणा अते फिर उसनूं मनौणा पंजाबी लोक दा अण-निखड़वां अंग सी। मां दी बहन ‘मासी’ यानी मां वरगी सी, जिसदे घर जाणा मन्नो दूजे घर मां दी गोद विच बैठणा सी, अते उसदे पती नूं ‘मासड़’ केहा जांदा सी। अज्ज दी कान्वैंट-शिक्षित पीढ़ी इन्हां सारेआं, वखो-वखरे भाव-रंगां नूं मिटा के सबनूं इक ही थाल विच परोस दिंदी है कि श्एह मेरा अंकल हैश्। इस नाल ना ताए दा आदर बचेआ, ना मामे दा लाड, ना चाचे दी दोस्ती अते ना फुफ्फड़ दी मज़ाकिया नौक-झोंक।
अंग्रेज़ी दा दूसरा सब तों सपाट शब्द ‘कज़न’ है। इस इक शब्द ने भाई-बहन दे पवित्र, बहु-रंगी अते नफ़ासत भरे रिश्ते नूं पूरी तरहां भावहीन कर दित्ता है। पंजाबी भाषा विच ‘कज़न’ नाम दी कोई बे-नाम चीज़ नहीं सी। एत्थे हर भाई अते हर बहन दी पछाण उसदे ख़ून दे पते नाल दर्ज़ हुंदी सी। ताए दे पुत्त या धी नूं ततेरा भाई या ततेरी भैण केहा जांदा सी। चाचे दे बच्चेआं नूं चचेरा भाई या चचेरी भैण, मासी दे बच्चेआं नूं मसेरा भाई या मसेरी भैण, भुआ दे बच्चेआं नूं फुफेरा भाई या फुफेरी भैण, अते मामे दे बच्चेआं नूं ममेरा भाई या ममेरी भैण आखेआ जांदा सी।
पंजाबी समाज विच एह वंड सिर्फ़ नाम लई नहीं सी, बल्कि गोत अते व्याह-शादी दी मर्यादा लई बहुत ज़रूरी सी। ततेरे अते चचेरे भाई-भैण इक ही गोत दे होण कारण सगे भाई-भैण मन्ने जांदे सन, जिन्हां विच व्याह दा सोचणा वी पाप सी। नानके पख दे ममेरे अते मसेरे रिश्ते वी ‘दुध-सांझ’ नाल जुड़े होण कारण सत्कार दे पात्र सन। जदों कोई कहंदा सी कि एह मेरा मसेरा भाई ऐ, तां सुणन वाले नूं इक पल विच समझ आ जांदी सी कि इन्हां दिआं मावां सगिआं भैणां हन, इन्हां दा नानका पिंड इक्को है, अते इन्हां दे रिश्ते विच किन्नी मिठास होवेगी। अज्ज जदों कोई कहंदा है कि ‘एह मेरी कज़िन है’, तां पता ही नहीं लगदा कि एह चाची दी कुड़ी है, मामे दी, मासी दी, या महज़ किसे दूर दे रिश्तेदार दी। रिश्ते दी रूह ही इस औपचारिकता विच ग़ायब हो गई है।
पंजाब दे वख-वख खित्तेआं, ख़ास कर मालवे दे पेंडू इलाके विच साकाचारी दी शब्दावली दा अपणा ही स्वाद सी। मालवे विच पिता नूं अक्सर ‘बापू’ या ‘मााऊ’ केहा जांदा सी, जदकि वड्डे भाई नूं ‘भाजी’ या ‘भाया जी’। मां लई ‘बेबे’ शब्द विच जो ममत्व अते वडिआई सी, उह अज्ज दे ‘मम्मी’ विच कदे नहीं आ सकदी। वड्डी बहन लई ‘जीजी’ या ‘बीबी’ शब्द आदर दा शिखर सी। भाई दी पत्नी लई ‘भरजाई’ शब्द बणेआ, जिसदा देवर नाल रिश्ता मां, सहेली अते मार्गदर्शक दा संगम हुंदा सी। दो भरावां दिआं पत्निआं लई ‘दराणी’ अते ‘जिठाणी’ शब्द सन। पती दी बहन ‘नणद’ अते उसदे पती ‘नणदोई’ दी भाभी नाल नोक-झोंक पंजाबी लोक-संगीत दी जान रही है। एह सारे शब्द सिर्फ़ नाम नहीं सन, एह इक संयुक्त परिवार नूं आपस विच जोड़ के रखण वाले सीमेंट सन।
अंग्रेज़ी ने व्याह तों बाद बणन वाले पवित्र रिश्तेआं नूं वी इक बे-जान संबोधन ‘इन ला’ नाल जोड़ के निपटा दित्ता। पंजाबी दे व्याह-साकाचारी दी नफ़ासत वेखो तां सोहरा अते सस्स पिता-माता समान आदरणीय हुंदे सन। पती दा वड्डा भाई ‘जेठ’ सी, जिसदे साहमणे संकोच, घूँघट अते गहरा सत्कार सी, जदकि पती दा छोटा भाई ‘देवर’ सहेली वांग लाडला अते हस्स-बोल सकण वाला साक सी। पत्नी दा भाई ‘साला’ जीजे दी ज़िंदगी भर दी दोस्ताना सांझ बणदा सी, अते पत्नी दी बहन ‘साली’ नाल नोक-झोंक पंजाबी सभ्याचार दा सब तों रंगीला पहलू सी। दो भैणां दे पती ‘साढू’ बणदे सन, अते दो परिवांरां दे बुज़ुर्ग ‘कुड़म’ अते ‘कुड़मणी’ बण के दो वक्खो-वक्ख कुलां नूं इक सांझ विच बन्हदे सन। अज्ज श्ब्रदर इन लाश् कह देण नाल एह भेद ही मुक्क जांदा है कि गल जेठ दी हो रही है, देवर दी, साले दी, या बहनोई दी। भाषा दी इस दरिद्रता ने साडे समाजी संबधां दी संवेदनशीलता नूं कुंद कर दित्ता है।
पंजाबी लोक-धारा विच इन्हां रिश्तेआं दे बिना कोई गीत, बोली, सुहाग या घोड़ी पूरी नहीं हुंदी सी। सुहाग गौंदी कुड़ी अपणे बाबल नूं देस दा राजा अते ताए नूं प्रधान आखदी सी, अते मामे दे घर वज्जी वधाई दा ज़िक्र हर कारज विच औंदा सी। नणद-भाभी दी तकरार अते वीरे दी सिफ़त नाल पंजाबी बोलियां गूंजदिआं सन। जेकर साडी भाषा विचों ताया, चाचा, मामा, नणद, भरजाई वरगे शब्द ही मिट गए, तां साडिआं औण वालिआं पीढ़ियां नूं एह लोक-गीत अते किस्से समझ किवें औणगे। उह वारिस शाह दी हीर किवें पढ़णगे, जित्थे हीर अपणी भाभी सहती नाल संवादां दे तीर चलौंदी है।
एह भाषाई त्रासदी रातो-रात नहीं घटी, बल्कि इसदे पिछे गहरे सामाजिक बदलाव कम कर रहे हन। पिंडां विचों लोकां दा शहरां वल्ल पलायन अते एकल परिवार दे चलन ने चाचे, ताए, भुआ दे साझे वेहड़े नूं ख़त्म कर दित्ता। जदों बच्चे ने चाचे-ताए नूं रोज़ वेखणा ही नहीं, तां उस लई उह सिर्फ़ दूर दा ‘अंकल’ बण के रह जांदा है। शहरी स्कूलां विच शुरू तों ही ‘यू फॉर अंकल’ अते ‘ए फॉर आंटी’ रटाया जांदा है, अते पंजाबी भाषा नूं घरां विच वी देसी समझ के बच्चे नाल टुट्टी-फुट्टी अंग्रेज़ी विच गल्ल करण दा रुझान वधेआ है। पंजाब दी वड्डी आबादी कनाडा, इंग्लैंड, आस्ट्रेलिया जा बसी है, जित्थे जमण-पलण वाली पीढ़ी लई साकाचारी दी एह बारीक वंड समझना मुहाल हो गया, अते उन्हां लई गोरे कल्चर दे अंकल-आंटी ही आसान समाधान बण गए। अज्ज रिश्ते भावात्मक सांझ नालों ज़्यादा उपयोगितावाद ते टिके हन, अते जदों रिश्ते औपचारिकता बन जांण, तां भाषा वी औपचारिक अते सपाट हो जांदी है।
जदों कोई शब्द मरदा है, तां उसदे नाल इक पूरी सोच, इक सलीका अते इक अहसास मर जांदा है। श्मासीश् कहण नाल जो कलेजे नूं ठंडक मिलदी सी, उह श्आंटीश् कहण नाल कदे नहीं मिल सकदी। ‘ताया जी’ दे गोड्डे हत्थ ला के जो असीस मिलदी सी, उह ‘हलो अंकल’ दे हैंडशेक विच उड़ पुड जांदी है। ‘मसेरे भरा’ लई जो कुरबानी दा जज़्बा सी, उह ‘ए मेरा कज़िन है’ दे बनावटी वाक्य विच गुम हो जांदा है। पंजाबी भाषा दा संबधकी लचीलापन अते उसदी साकाचारी साडी सब तों वड्डी मनोवैज्ञानिक पूँजी सी, जिसने सानूँ डिप्रेशन, इकल्लापन अते बिसराव तों बचा के रखेआ सी।
पंजाबी विच अलोप हो रहे रिश्तेआं दे मूल नाम सानूँ चेतावनी दे रहे हन कि असीं तरक़्क़ी दी दौड़ विच अपणी आत्मा नूं गिरवी रख बैठे हां। ‘अंकल’ अते ‘कज़न’ पश्चिमी समाज दी ज़रूरत हो सकदे हन, जित्थे सामाजिक ढांचा व्यक्तिवादी है, पर पंजाब दा चरित्र सांझी सोच दा है। जेकर असीं अपनी भाषा, साहित्य अते विरसे नूं ज़िंदा रखणा चौहंदे हां, तां सानूँ अपणे घरां विच, अपणे बच्चेआं दी ज़ुबान ते मुड़ उही लफ़्ज़ वापस ल्यौणे पैणगे। औण वाली पीढ़ी नूं दस्सणा पवेगा कि पिता दे वड्डे भाई नूं अंकल नहीं, ताया जी कह के सत्कार देईदा है। मां दे वीर नूं मामा जी आख के गले लगाईदा है। चाची, मासी अते भुआ नूं उन्हां दे सुच्चे नांवां नाल पुकार के अपणे वेहड़े नूं महकाइदा है। लफ़्ज़ां नूं बचौणा असल विच साकां नूं बचौणा है, अते साकां नूं बचौणा ही पंजाबीयत नूं अमर रखणा है। जदों साडे वेहड़ेआं विच मुड़ मामे, चाचे अते मसेर-साक दे हासे गूँजणगे, उदों ही साडी माँ-बोली पंजाबी अपने असल गौरव नाल मुस्कुराएगी।
-लेखक जाने-माने शायर और आकाशवाणी के पूर्व वरिष्ठ उद्घोषक हैं