शिखर दुपहर दा शायर

राजेश चड्ढ़ा
पंजाबी काव्य जगत विच शिव कुमार बटालवी अजेहा नाम है, जिसने आधुनिक पंजाबी कविता नूँ दर्द, विछोड़े अते रूहानी तड़प दा इक नवां अंबर बख़्शेया है। शिव नूँ पंजाबी साहित्य दा जॉन कीट्स कहे जाण पिच्छे दा मूल कारण एह है कि, कीट्स वांग शिव दी लेखनी विच वी सौंदर्य, मृत्यु अते विरह दा इक अद्भूत ते अलौकिक सुमेल है।
शिव दी कविता केवल शब्दां दा जोड़ नहीं है, बल्कि एह रूह दे उस सीने दा सेक है जो इश्क़-ए-मजाज़ी यानी लौकिक प्रेम दे झरोखे तों शुरू हो के इश्क़-ए-हक़ीक़ी यानी अलौकिक या ईश्वरीय प्रेम दी तड़प विच जा बदलदा है। उन्हां दी आवाज़, उन्हां दे बिम्ब अते उन्हां दी सादा-बयानी ने पंजाबी काव्य संसार विच अजेहा मुक़ाम हासिल कीता है जो कदे-कदे ही किसे शायर दे हिस्से औंदा है।
शिव कुमार बटालवी दी ज़िंदगी खुद उन्हां दी कविता वांग ही इक अधूरी, दर्द भरी बेमिसाल नज़्म वरगी सी। शिव कुमार बटालवी दा जन्म 23 जुलाई 1936 नूँ वड्ढा पिंड लोहटिया, शकरगढ़ तहसील, जिला सियालकोट, जो अज्ज पाकिस्तान विच है, विखे होया सी। 1947 दी वंड दे हादसे तों बाद उन्हां दा परिवार गुरदासपुर ज़िले दे बटाला विच आ के वस्स गया। एसे बटाला शहर दे नां तों शिव श्शिव बटालवीश् कहाए।
शिव नूँ सही अर्थां विच बिरहा दा सुल्तान केहा जांदा है। एह दी वजहा एह है कि पंजाब दे सूफ़ी बाबा फ़रीद, शाह हुसैन अते बुल्ले शाह दी सूफ़ी परम्परा विच जो बिरहा रूह नूँ पवित्र करण दा ज़रिया सी, शिव ने उसनूँ आधुनिक रूप विच अपणियां नज़्मां दा सरमाया बणाया।
शिव दी कविता विच दुख कोई मजबूरी नहीं, बल्कि एह उन्हां दी इबादतगाह सी। शिव दुक्खां नूँ अपणी रूह दी ख़ुराक मनदे सी। शिव ने आखेया वी है-
गमां दी रात लम्बी है,
जा मेरे गीत लम्बे ने
ना भैड़ी रात मुक्दी है,
ना मेरे गीत मुक्दे ने
एह कविता दसदी है कि शिव दे काव्य दी सब तों वड्डी खासियत एह है कि उन्हां ने दर्द नूँ रोणा नहीं बणाया, बल्कि उसनूँ इक सुच्चा शृंगार दित्ता। उन्हां दे हर शब्द विच पंजाब दी मिट्टी अते रुक्खां दी हवावां दी सादगी घुल-मिल जांदी है।
शिव कुमार बटालवी दी काव्य-कला दी परख उन्हां दिआं कालजयी रचनावां दे मूल अंशां तों सहज ही कीती जा सकती है। शिव आखदे हन-
शिखर दुपहर सिर ‘ते
मेरा ढल चल्ल्या परछावां
कबरां उडीक दियां, मैनूं
ज्युं पुत्तरां नूं मावां
शिव दी एह रचना पंजाबी काव्य दे सब तों खूबसूरत बिम्बां विचों इक है। एत्थे शिखर दुपहर जवानी अते ज़िंदगी दे उस तिक्खे मोड़ दा प्रतीक है, जित्थे परछावां वी साथ छड्ड जांदा है अते सिर्फ़ तड़प ते मौत दी पुकार बाकी रह जांदी है। इस गीत विच छांवां यानी प्यार दी खोज विच निकले शायर नूँ सिर्फ़ सुक्के रुक्ख ते हसदीआं कंधां यानी बेदर्द समाज ही मिलदा है। एस गीत विच इंसानी एकाकीपन अते रूह दी बेताबी नूँ बहोत ही कोमल अंदाज़ विच पिरोया गया है।
निष्पाप पीड़ा अते मां नाल संवाद करदेयां शिव अपणे इक गीत विच आखदे हन-
माये नी माये
मैं इक शिकरा यार बणाया
ओदे सिर ते कलगी
ओदे पैरीं झांजर
ते ओ चोग चुगेंदा आया
चूरी कुट्टां तां ओ खांदा नाही
ओन्हुं दिल दा मांस खवाया
इक उडारी ऐसी मारी
ओ मुड़ वतनी ना आया
एस गीत विच मां दा बिम्ब बहोत गहरा है। शिव अपणे दिल दा हर दर्द, अपणी हर दीवानगी अपणी मां साहमणे ही खोल के रखदे हन। माए नी माए उशिव दी अजेही रचना है, जिसने हर संवेदनशील पाठक दे दिल नूँ झकझोरेआ है। एस गीत विच महबूब नूँ शिकरा आखेआ गया है। शिकरा इक अजेहा पंछी है जो कदे पालतू नहीं बणदा, आज़ाद अते मांस दे शिकारी सुभाव दा हुंदा है। शिव ने अपणे प्रेमी नूँ शिकरे दा रूपक देके एह दर्शाया है कि इश्क़ विच अपणी हस्ती लुटा देण दे बावजूद वी महबूब दा बेवफ़ा होणा तय सी।
शिव कुमार बटालवी सिर्फ़ रुमानियत या बिरहा दे ही शायर नहीं सन, शिव कुदरत दे वी बहोत वड्डे उपासक सन। उन्हां दी कविता रुक्ख यानी पेड़ पंजाबी साहित्य दी इक अमर रचना है, जित्थे उन्हां ने मनुख अते रुक्ख दे रिश्ते नूँ इक नंवे आध्यात्मिक धरातल ते पहुँचा दित्ता है। शिव कहंदे हन-
कुज रुख मैनूं पुत्त लगदे ने
कुज रुख लगदे मांवां
कुज रुख नूंहां धीयां लगदे
कुज रुख वांग भरांवां
कुज रुख मेरे बाबे वाक्कण
पत्तर टांवां टांवां
कुज रुख मेरी दादी वरगे
चूरी पावन कांवां
कुज रुख यांरा वरगे लगदे
चुम्मां ते गल्ल लावां
एस कविता विच शिव ने कुदरत दा मानवीकरण कीता है। पेड़ सिर्फ़ लकड़ी या छां देण वाली वस्तु नहीं हन, बल्कि एह माँ, बाप, धी, ते दादियां वरगे ज्यूंदे-जागदे रिश्ते हन। एह कविता आधुनिक दौर दे पर्यावरण संकट ते इंसानी संवेदना दे खोण ते इक तिक्खा पर कोमल प्रहार है।
1965 विच प्रकाशित शिव दा काव्य-नाटक लूणा शिव दी रचनात्मकता दा शिखर मनेआ जांदा है। एस शाहकार रचना लई शिव नूँ 1967 विच साहित्य अकादमी पुरस्कार दित्ता गया। शिव एह पुरस्कार हासिल करण वाले सब तों घट्ट उम्र दे शायर सन।
लूणा विच शिव ने पंजाब दी प्राचीन लोक-गाथा पूरण भगत नूँ बिल्कुल नवां ते क्रन्तिकारी मोड़ दित्ता है। पारम्परिक कथा विच लूणा नूँ इक श्कुकर्मिनश् या श्चरित्रहीनश् औरत मनेआ जांदा सी, जिसने अपने पति राजा सलवाण दे पुत्त पूरण ते डोरे पाये। पर शिव ने लूणा दे पक्ख तों लिख के उसदी मानसिक पीड़ा, बुड्ढ़े राजा नाल जबरन व्याह नूँ लै के उसदी उम्र दे असंतुलन अते औरत ते हुंदे समाज़िक ज़ुल्म नूँ साहमणे रखेआ है। शिव आखदे हन-
धरमी बाबल पाप कमाया
लड़ लाया साडे फुल्ल कुम्हलाया
जिस दा इच्छरां रूप हंढाया
मैं पूरण दी मां । पूरण दे हाण दी ।
पिता जे धी दा रूप हंढावे
लोका वे ! तैनूं लाज ना आवे
जे लूणा पूरण नूं चाहवे
चरित्र-हीन कव्हे क्युं जीभ जहान दी ।
शिव ने लूणा राहीं पुरुष-सत्ता वाले समाज दी दोहरी मानसिकता ते तिक्खा सवाल उठाया है। उन्हां ने लूणा नूँ इक गुनाहगार दी बजाय इक समाज़िक पीड़िता दे रूप विच स्थापित कीता है। एह उन्हां दी प्रगतिशील अते आधुनिक सोच दा सब तों वड्डा सुबूत है।
शिव दी कविता दे बिम्ब पंजाब दे जनजीवन अते कुदरत तों औण वाले हन। नाग, शिकरा, कबर, शिखर दुपहर, परछावां, हंझू, रात, चानणी, रुक्ख-एह सारे शब्द उन्हां दी कविता विच आ के ज्यूंदे-जागदे किरदार बण जांदे हन।
शिव दी हर कविता विच इक कुदरती लय है। शिव अपणी कवितावां नूँ जिस तरन्नुम विच गौंदे सन, सुणन वाले कीले यानी मंत्रमुग्ध हो जांदे सन।
शिव दी भाषा बहोत सरल, सुच्ची ते मुहावरेदार है। उन्हां ने औखे शब्दां दी बजाय आम पंजाबी जनजीवन दी शब्दावली नूँ चुणेआ है।
निचोड़ रूप विच असीं आख सकदे हां कि शिव कुमार बटालवी पंजाबी भाषा दा अजेहा शायर है, जो कदे पुराणा नहीं हो सकदा। 23 जुलाई 1936 नूँ जन्मे अते 6 मई 1973 नूँ महज़ 36 साल दी उम्र विच शारीरिक रूप तों विदा होण वाले शिव अज्ज वी अपणियां नज़्मां, गीतां अते ग़ज़लां राहीं हर दिल विच धड़क रहे हन।
शिव बटालवी दी मृत्यु उन्हां दे ननिहाल पिंड मँगियाल, पठानकोट विच होई। शिव ने अपणी अकाल मौत तों बहोत पहलां ही अपणी मौत दी भविखवाणी अपणी कविता विच कर दित्ती सी-
असां तां जोबन रुत्ते मरणा
मुड़ जाणा असां भरे भराए
हिजर तेरे दी कर परकरमा
असां तां जोबन रुत्ते मरणा
जोबन रुत्ते जो वी मरदा
फुल्ल बणे जां तारा
जोबन रुत्ते आशिक मरदे
जां कोयी करमां वाला
जां उह मरण
कि जिन्हां लिखाए
हिजर धुरों विच करमां
हिजर तुहाडा असां मुबारक
नाल बहशतीं खड़णा
असां तां जोबन रुत्ते मरणा।
शिव ने पंजाबी कविता नूँ रूढ़िवादिता तों कड्ड के इक अजेही रूहानी मिठास ते दर्द दित्ता है, जिसने सरहदां नूँ पार करके पूरी दुनिया विच पंजाबी माँ-बोली दा परचम लहराया है। जदों तक दुनिया विच प्यार, जुदाई, कुदरत अते दर्द ज़िन्दा रहेगा, शिव दे बोल गूंजदे रहणगे।
-लेेखक जाने-माने शायर और आकाशवाणी के पूर्व वरिष्ठ उद्घोषक हैं