राजेश चड्ढ़ा
पंजाब दी पावन धरती हमेशा तों ही संतां अते दरवेशां दा घर रही है। एत्थों दे दरियावां दे पाणी विच सिर्फ़ रवानी ही नहीं, सगों रूहानी संगीत वी वगदा है। बाबा फ़रीद तों शुरू होया पंजाबी शायरी दा सफ़र शाह हुसैन, सुल्तान बाहू ते बाबा बुल्ले शाह तों हुंदा होया जदों 19वीं सदी विच कदम रखदा है, तां उस वेले सब तों चमकदे सितारे बण के उभरदे हन-मियाँ मोहम्मद बख़्श। मियाँ मोहम्मद बख़्श नूँ पंजाबी सूफ़ी काव्य अते किस्सा-काव्य दा ‘रूमी; केहा जांदा है।
13वीं सदी विच होये अफ़गानिस्तान दे सूफ़ी विचारक ‘रूमी’ दा कहणा सी कि ईश्वर बाहर नहीं, सगों हर इंसान दे अंदर मौजूद है अते प्रेम ही एस ब्रह्मांड दी सबतों वड्डी ताकत है। मियाँ मोहम्मद बख़्श दी लेखनी विच वी जित्थे रूहानी इश्क़ दी तड़प है, ओत्थे ही आम लोकां लई नैतिक, समाजी अते व्यावहारिक जीवन जीण दा ढूंगा ज्ञान वी है। उन्हां दी शाहकार रचना ‘सैफ़-उल-मलुक’ जिसनूँ ‘सफ़र-उल-इश्क़; वी केहा जांदा है। दर असल हिमालय दी काघन घाटी दे उत्तरी छोर दी बहुत ऊंचाई ते स्थित धरती दी सब तों खूबसूरत थांवां विचों इक सैफ-उल-मलूक झील दे नां दे नाल जुड़ी है। इसदी इक अलहदा प्रेमकथा है।
बहरहाल सैफ-उल-मलूक नां दी एह कृति प्रेम दे विचकारले राह दी इक आत्मिक यात्रा है। एह किसे मंजिल तक पहुँचण तों वध, प्रेम दी भावनावां विच डूबण अते उसदे दर्द दी मस्ती दे अहसास नूँ दर्शाैंदी है। एह पंजाबी साहित्य दा इक अजेहा अनमोल सरमाया है, जिसदे दोहे अज्ज वी पंजाब दे बच्चे-बच्चे दी ज़बान ते हन।
मियाँ मोहम्मद बख़्श दी शैली दी सब तों वड्डी खूबी एह है कि उन्हां ने गूढ़ सूफ़ियाना दर्शन नूँ बडी ही सादा, ठेठ ते मिठास भरी पंजाबी विच ढालेया है। उन्हां दे दोहे सिर्फ कविता नहीं, सगों ज़िंदगी दे सागर नूँ पार करण लई रोशनी दी मीनार हन।
संसार दी नश्वरता अते वक़्त दी कद्र दा जिक्र करदेयां मोहम्मद बख़्श आखदे हन-
सदा ना छुरियां काँ सवेरे, सदा ना रौनक़ बागीं।
सदा ना मापे हुस्न जवानी, सदा ना सोहबतीं जागीं॥
यानी कि बाग-बगीचेयां विच कदे वी सदा लई रौनक़ नहीं रहंदी, ना ही चिड़ियां अते कां हर सवेरे चहकदे रहणगे। एसे तरहां, इंसान नूँ अपनी जवानी, हुस्न या मा-प्यो दे साथ ते अहंकार अते कदे मान नहीं करना चाहिदा, क्योंकि एह सब नाशवान हन। संसार दियां महफ़िलां ते सोहबतां यानी दोस्तियां हमेशा नहीं रहणगियां।
मियाँ मोहम्मद बख़्श ने बाहरी यथार्थ नूँ रूहानी यथार्थ नाल जोड़न विच महारत हासिल है। उन्हां आखेया है-
लोए लोए भर लै कुड़ीए, जे तुध भांडा भरना।
शाम पई बिन शाम मुहम्मद, घर जाणी कूं डरना॥
बाहर तों देखिए तां एह इक मुट्यार नूँ दिन दे चानण विच खूह तों पानी भरण दी व्यावहारिक गल्ल लगदी है कि रात होण तों पहलां अपणा घड़ा भर लै। पर इसदा गूढ़ रूहानी भाव एह है कि हे इंसान! जदों तक तैनूँ एह ज़िंदगी दा चानण मिलेया होया है, अपणे अच्छे कर्मां नाल रूह दे घड़े नूँ भर लै। जदों मौत दी शाम पै गई, तां अपणे मालिक दे साहमणे खाली हत्थ जाण तों डर लगेगा। वक़्त गुजर जांण तों बाद पछतावे तों बिना कुज हत्थ नहीं औणा।
मियाँ मोहम्मद बख़्श ने आपसी प्यार अते भाईचारे नूँ धरम दी नीं मन्नेया है। उन्हां केहा है-
दुश्मन मरे ते ख़ुशी ना करिए, सज्णां वी मर जाणा।
डीगर ते दिन गया मुहम्मद, ओड़क नूँ टुर जाणा॥
मियाँ मोहम्मद कहंदे हन कि जेकर तुहाडा कोई दुश्मन वी मर जावे, तां कदे ख़ुशी नहीं मनौणी चाहिदी, क्योंकि मौत दी मार तों कोई नहीं बच सकदा। तुहाडे अपणे सजणां ने वी इक दिन एस संसार तों चले जाणा है। जिवें दिन ढल जांदा है, ओसे तरहां हर इंसान दी ज़िंदगी ढल रही है अते अखीरकार सब ने एत्थों विदा हो जाणा है। जदों मंज़िल सब दी इक ही है, तां फेर आपस विच नफ़रत या दुश्मनी किस लई? मियाँ मोहम्मद बख़्श दे मुताबिक एस तो वध के दिल विच करुणा ते निम्रता पैदा नहीं कीती जा सकदी।
मियाँ मोहम्मद बख़्श ने ‘मै’ नूँ मारना सब तों लाज़मी मन्नेया है। जदों तक मन विच अहंकार है, रब्ब ओत्थे वास नहीं करदा। मोहम्मद बख़्श ने निम्रता नूँ ही असली ज्ञान मन्नेया है। मियां मोहम्मद आखदे हन-
उचे जा कूं ना बहिए, मत कोई कवे उथ शुक नी।
नीवे थां कूं बहिए मुहम्मद, मत कोई कवे उठ नी॥
कहण दा भाव है कि समाज़ या महफ़िल विच कदे वी अहंकार नाल उचे थां ते बैठण दी कोशिश ना करो, की पता कद कोई तुहानूं ओत्थों बेइज्ज़त करके उठा देवे। इसदे उलट, हमेशा नीवे थां विच बैठो, जित्थे तहानूँ कोई एह ना आखे कि एत्थों उठ। असल मोहब्बत विच ओही परवान चढ़दा है जो अपणे-आप नूँ मिटा दिंदा है। नदियां हमेशा नींवे मैदानां वल वग्गदीयां हन, पहाड़ां दीयां चोटियां ते पाणी कदे नहीं टिकदा।
इश्क़ दा राह कोई सौखा राह नहीं है। एह कड़े इम्तिहान मँगदा है। जो स्वार्थ लई यार बणदे हन, ओह सच्चे साझीदार नहीं हन। इस गल्ल नूँ मियाँ मोहम्मद बख़्श एस तरहां कहंदे हन कि-
यार उही जो यार दी ख़ातिर, लोहे ते सिर देवे।
मुसीबत दे विच्च छड्ड के यार कूं, जो भज्जे ओ यार केवे॥
यानी सच्चा यार या प्रेमी ओही है जो अपने महबूब दी ख़ातिर कड़े तों कड़े संकट नूँ वी हंस के बर्दाश्त कर लवे। जो इंसान मुसीबत या तंगी दे वक्त अपणे यार नूँ छड्ड के भज्ज जावे, उसनूँ यार कहणा ही यारी शब्द दी तोहीन है।
मियाँ मोहम्मद दे मुताबिक जदों तक इंसान उत्तम ते रूहानी लोकां दी संगत नहीं करदा, उदों तक बाहरी तौर ते धर्म दा रौला मचौण दा कोई फ़ायदा नहीं है। उन्हां आखेया है-
ख़ास जणां दी सोहबत नाहीं, ऐवें रौल मचाणा।
कौड़े रुक्ख कूं शक्कर पावे, कदे ना मिट्ठा होना॥
कहण दा भाव है कि जिवें किसे कौड़े दरख़्त दी जड़ विच भांवे किन्नी वी शक्कर पा दित्ती जावे, ओह कदे वी मिट्ठा नहीं हो सकदा उस तरहां खोटे मन वाले इंसान उते बाहरी आडम्बरां दा कोई असर नहीं हुंदा। सच्चा बदलाव अन्दर दी नीयत बदलन नाल औंदा है।
संसार दी रीत ते तिक्खा व्यंग्य करदेयां मियाँ मोहम्मद बख़्श आखदे हन-
इक कूं सुट्ट के ख़ाक दे अन्दर, दूजा महल बणावे।
एह संसार मुसाफ़िरखाना, कोई आवे कोई जावे॥
भाव है कि एत्थे इक इंसान नूँ मिट्टी दे सुपुर्द करके, उसदी ज़मीन ते दूजा इंसान अपने महल बणौण विच लग्ग जांदा है। ओ एह भुल्ल जांदा है कि एह दुनिया सिर्फ़ इक मुसाफ़िरखाना है, जित्थे कोई आ रेहा है ते कोई जा रेहा है। कदे वी किसे दी हस्ती एत्थे सदा लई नहीं टिकी रहणी।
ज्ञान लई मन विच पात्रता अते निम्रता लाज़मी है। एस गल्ल नूँ मियाँ मोहम्मद ने अपणे दोहे विच एस तरहां आखेया है-
काँ कूं मोती कदे ना सोहंदे, ना सोहंदे सर नाली।
मूरख अक्ख कूं ज्ञान मुहम्मद, ऐवें जांदी खाली॥
यानी काँ नूँ कदे मोती अच्छे नहीं लगदे, ना ही गन्दी नाली नूँ सरोवर दा पाणी रास औंदा है। ओसे तरहां मूरख अते अहंकारी इंसान दे साहमणे चाहे ज्ञान अते रूहानी सचाई दी किन्नी ही वड्डी गल्ल कर दित्ती जावे, उसदी अक्ख कद्र नहीं पछाणदी अते ओ ऐवें ही खाली रह जांदा है।
मियाँ मोहम्मद बख़्श ने अपणी काव्य-शैली विच छंद दा इस्तेमाल बडे ही सुरीले ढंग नाल कीता है। उन्हां दे अक्खर इन्ने सादा हन कि इक अनपढ़ वी उन्हां दे दोहे सुण के भावुक हो जांदा है। उन्हां दे वरते सारे बिम्ब पंजाब दे जनजीवन विचों लए गए हन, इसलई एह सिद्धे दिलां विच दर्ज हो जांदे हन। असी आख सकदे हां कि मियाँ मोहम्मद बख़्श दी कविता सिर्फ़ 19वीं सदी दी विरासत नहीं है, सगों एह अज्ज़ दे दिखावे अते नफ़रत भरे दौर विच वी ओन्नी ही संबधित है, जिन्नी सदियां पहलां सी। मियाँ मोहम्मद बख़्श दे दोहे सानूँ वार-वार चेतावनी दिंदे हन कि बाहरी पाखंड, लालच अते नफ़रत नूँ छड्ड के इंसानियत, सादगी ते सच्चे प्रेम दा राह फड़ना ही ज़िंदगी दी असली मंज़िल है।
-लेखक जाने-माने शायर और आकाशवाणी के पूर्व वरिष्ठ उदघोषक हैं
About the Author
