मिट्टी दी खुशबू: अर्थ पतन अते भाषा मरण

राजेश चड्ढ़ा
भाषा इक दरिया वांग वगदी है। जिस तरहां दरिया रस्ते विच मिट्टी, रेत अते नवां पाणी समेटदा होया अपणे कंडे बदल लैंदा है, ठीक उसे तरहां भाषा वी सदियां दे सफ़र दौरान नए लफ़्ज़ अपनौंदी है अते पुराने लफ़्ज़ां दे अर्थां नूं नवां रंग दिंदी है। भाषा-विज्ञान दे माहिर इस अमल नूं श्अर्थ-पतनश् आखदे हन। जदों कोई लफ़्ज़ अपने विशाल, पवित्र, रूहानी या सकारात्मक अर्थां तों ढह के संकुचित, तिरस्कृत या नकारात्मक धरातल ते डिग्ग जांदा है, तां उसनूं भाषा-विज्ञान दी बोली विच श्अर्थ-निघारश् या श्अर्थ पतनश् केहा जांदा है।
दूजियां माँ-बोलियां दे वांग पंजाबी भाषा वी दुनिया दी बलवान, रूहानी अते लोकाचार नाल लबरेज़ बोलियां विचों इक है। इस बोली विच फ़ारसी, अरबी दा फ़लसफ़ा अते पेंडू जीवन दी मिठास इक-दूजे नाल एस कदर घुले-मिले हन कि हर लफ़्ज़ अपने पिछे इक मुकम्मल तहज़ीब संभाली बैठा है। पर अफ़सोस, समय दे थपेड़ेआं, सामंती मानसिकता, सामाजिक गिरावट अते भाषाई बे-ध्यानी ने पंजाबी दे अनेक अजेहे शब्दां दी आत्मा नूं ज़ख़्मी कर दित्ता है, जिन्हां दा मूल अर्थ कदे अर्शां ते उड्डारी मारदा सी, पर अज्ज एह ज़मीनी गाल़, ताना या तंज़ बण के रह गए हन।
पंजाबी दे अर्थ-निघार दा सब तों दर्दनाक शिकार होया शब्द ‘ख़सम’ है।
ख़सम दा मूल अरथ सी- मालिक, रक्षक, पालनहार या मुहाफ़िज़। एस शब्द दा सिद्दा ताल्लुक़ उस अकाल-पुरख नाल सी जो सारी सृष्टि दा इकल्ला स्वामी है। श्री गुरु ग्रंथ साहिब जी दे विच एह शब्द परमात्मा लई असीम सत्कार अते प्रेम नाल वरतेआ गया है
तू मेरा खसमु तूहै दातारा
गुरबाणी विच जीव-स्त्री दा सच्चा ख़सम सिर्फ़ वाहेगुरु है। सूफ़ी कलाम विच वी ख़सम दा भाव उस हक़ीक़ी मुहाफ़िज़ तों सी जिसदे आसरे फ़क़ीर अपणी कुल हस्ती सौंप दिंदा सी। समय बदलण नाल एह रूहानी शब्द सिर्फ़ संसारी पती या हसबैंड तक सीमित होया, अते फिर सामंती अते घरेलू कलेशां दी बोली विच डिग्ग के सिर्फ़ कोसणे दा ज़रिया बन गया-
ख़समां नूं खाणी!
ख़सम पिट्टणी!
हुण बैठ के ख़सम दा सिर खा!
कदे जो शब्द कायनात दे दाता लई सिजदे विच बोलेआ जांदा सी, अज्ज एह घरों-घरी लड़े जाण वाले ताने-मेहणे विच सिमट चुकेआ है। एस शब्द दा रूहानी नूर पूरी तरहां बुझ चुकेआ है।
पंजाबी सभ्याचार अते सूफ़ी फ़लसफ़े विच ‘मलंग’ दा मर्तबा दरवेशी दा सब तों उच्‍चा शिखर मन्नेआ जांदा सी। मलंग अजेहा साधक हुंदा सी जिस ने अहंकार नूं ख़त्म करके अनंत स्थान विच डेरा ला लेआ होवे। उसनूं ना कल दी फ़िक्र सी, ना अज्ज दी चिंता।
मलंग उहो जो मन नूं मारे
हू दा विरद कमाए।
मलंग दा लिबास भले ही चिथड़े हुंदा सी, पर उसदी रूह बादशाहां तों वी अमीर हुंदी सी। एह दुनिया दे पाखंडी नियमां तों आज़ाद इक सच्चा क़लन्दर सी।
अज्ज साडे पेंडू अते शहरी समाज ने मलंग शब्द नूं चुक्क के नशेड़िआं, आवारा घुम्मण वालेआं अते बे-रोज़गार वेहलड़ां दे सिर मढ़ दित्ता है। जे कोई मुंडा कम-कार ना करे, मेलेयां विच धक्के खावे, तां केहा जांदा है-
एह तां मलंग बणेआ फिरदा ऐ
इक पवित्र सूफ़ी अवस्था दा सामाजिक गाली-गलौच विच बदलणा साडी चेतना दे खोखलेपण नूं दर्शाैंदा है।
‘चौधरी’ शब्द पंजाबी लोक-जीवन दे सामाजिक ढांचे दी रीढ़ सी। जिसदा अर्थ सी-सत्कारयोग मुखिया जो ज़िम्मेवारिआं नूं संभालण दी ताक़त रखदा होवे। चौधर कोई ज़ोर-ज़बरदस्ती नहीं, बल्कि सयाणप अते लोक-कल्याण दा ताज सी। क़िस्सा-काव्य विच पिंड दे चौधरी दा आदर राजा वांग हुंदा सी। सामंती निज़ाम दे ज़ुल्म अते अंग्रेज़ी राज दौरान पिसदे लोकां ने जदों चौधरिआं नूं हाकमा दे दलाल बणदे वेखेआ, तां इस शब्द दा मान डिग्ग पेआ। अज्ज पंजाबी विच एह शब्द सत्कार लई नहीं, बल्कि किसे दे नाजायज़ रुआब नूं नींवा बणौण लई बोलेआ जांदा है-
ऐवें ऐत्थे चौधरी ना बण
एह अपणी चौधर चमकौण आया सी
मूल रूप विच संस्कृत तो आया शब्द ‘मूढ़’ या ‘मूरख’ दा पुराणा संदर्भ सिर्फ़ बेवक़ूफ़ नहीं सी। सूफ़ी दर्शन विच मूरख उस सिद्धे-सादे, निष्कपट अते भोले व्यक्ति नूं वी आखेआ जांदा सी जो दुनियावी चालाकियां, ठग्गियां अते हिसाब-किताब तों बिल्कुल कोरा होवे। संत दादू ने केहा वी है-
दादू चतुरानन चतुरता
कहुं काम न आई।
मूरख थे सो तरि गए
हरि की सरनाई॥
भक्ति मार्ग विच चतुर लोकां नालों भोले या मूरख साधक नूं रब्ब दे नेड़े मन्नेआ गया है, क्योंकि उसदे अंदर अहंकार दी चतुराई नहीं हुंदी।
अज्ज मूरख शब्द दा अर्थ घिसट के मानसिक कमज़ोरी, मंदबुद्धी अते बे-अक़ली दी सब तों सिद्दी गाल़ बण चुकेआ है। किसे नूं मूरख आखणा उसदे आत्म-सम्मान उत्ते सिद्दा हमला मन्नेआ जांदा है। भोलापन अज्ज दी दुनिया विच अपराध बण गया है अते एह शब्द अपणी कोमलता गवा बैठा है।
पंजाबी काव्य परम्परा विच श्नख़राश् महबूब दी सुच्ची अदा, दिलकश नज़ाकत, संकोच अते नाज़-ओ-अंदाज़ लई वर्तेआ जांदा सी। एह आशिक़ दे दिल नूं खिच्च पौण वाली अजेही कोमल अदा सी जो प्रेमिका दे सुभाव नूं शृंगार दिंदी सी। वारिस शाह ने हीर दे हुस्न अते उसदिआं सहेलिआं दे चावां नूं बयान करदे होए एस नज़ाकत दे बहोत बंद गाए सन। अज्ज पंजाबी विच नख़रा किसे दी आफ़त, फालतू दी अकड़, सिर-दर्दी या अड़ियल व्यवहार दा पर्याय बण चुकेआ है। जे कोई अपनी जायज़ गल वी करे, तां केहा जांदा है-
उसदे नख़रे ही नहीं मुक्कदे
हुस्न दी नज़ाकत नूं असीं अहंकार अते तंग करन वाले सुभाव विच तबदील कर दित्ता है।
अरबी भाषा विच ‘वक़ूफ़’ दा अर्थ है-ठहराव, समझ, ज्ञान या वाक़फ़ियत। ‘वक़ूफ़ हासिल करना’ यानी किसे गल्ल तों जानकार होणा। इसदे अग्गे ‘बे’ लगण नाल शब्द बणेआ ‘बे-वक़ूफ़’, जिसदा सिद्दा अर्थ सी-अजेहा आदमी जो किसे ख़ास घटना या प्रसंग तों बे-ख़बर होवे, अनजान होवे या जिसनूं सूचना ना मिली होवे। अज्ज बेवक़ूफ़ दा मतलब अनजान नहीं, बल्कि जन्मजात अक़लहीन या मूरख कड्डेआ जांदा है। इस शब्द दा प्रयोग किसे दी अक़ल नूं ज़लील करण लई रोज़मर्रा दी बोली विच हज़ारां वार हुंदा है। इक सामान्य अनजान अवस्था नूं असीं अक़ल दी कमी बणा दित्ता।
पंजाबी शब्दां दे इस पतन दे पिछे कुज गहरे ऐतिहासिक अते सांस्कृतिक कारण रहे हन। पंजाब दा इतिहास जेड़ा कि संतां-फ़क़ीरां दा इतिहास है, ओथे ही एह जागीरदारां अते राजेआं दे अहंकार दा अखाड़ा वी रेहा है। सामंती समाज ने मेहनत, सादगी अते दरवेशी नाल जुड़े शब्दां नूं नीवां दिखा के गाल़ विच बदल दित्ता। आधुनिक पंजाबी कॉमेडी, फ़िल्मां अते सोशल मीडिया ने हासा पैदा करण लई संजीदा शब्दां दा मज़ाक बणा के उन्हां दे मूल अर्थां नूं उथला कर दित्ता है।
साहित्यकार, शायर, आलोचक अते अध्यापक किसे वी भाषा दे पहरेदार हुंदे हन। जेकर असीं अपणी भाषा दे लफ़्ज़ां नूं इस तरहां ही रुलण दित्ता, तां इक दिन साडी पूरी तहज़ीब रुल जावेगी। अज्ज दे कवियां नूं चाहिदा है कि अजेहे शब्दां नूं उन्हां दे मूल रूहानी अर्थ अते सामाजिक गौरव नाल अपणी शायरी विच प्रयोग करण, ताकि पाठक दी चेतना नूं झंझोड़ेआ जा सके। भाषाई इतिहास दा पाठ स्कूलां अते यूनिवर्सिटियां विच पढ़ाया जावे, ताकि नौजवान पीढ़ी नूं पता लगे कि जिन्हां लफ़्ज़ां नूं असी गाल़ समझ के बोलदे हाँ, एह कदे संतां दे सिजदे दी ज़ुबान सन।
भाषा दा मरण असल विच किसे क़ौम दी रूह दे मरण वांग हुंदा है। असीं जिन्हां शब्दां नूं गाल़ या तंज़ बणा के हस्सदे हां, एह कदे साडे पुरखेआं दी इबादत, उन्हां दे पसीने दा मान अते उन्हां दे सूफ़ियाना इश्क़ दी गवाही सन। भाषा नूं बचौण दा मतलब सिर्फ़ अक्खर बचौणा नहीं, बल्कि लफ़्ज़ां दे अंदर दफ़न उस सुच्ची रूह नूं मुड़ ज़िंदा करना है।
-लेखक सुविख्यात शायर और आकाशवाणी के पूर्व वरिष्ठ उद्घोषक हैं