पंजाबी विरसे दे गवाचे अक्खर

राजेश चड्ढ़ा
भाषा महज़ शब्दां दा समूह नहीं हुंदी, बल्कि एह किसे वी सभ्याचार, इतिहास, भूगोल ते माणसां दी मानसिक चेतना दा ज्यौंदा-जागदा दस्तावेज़ हुंदी है। जदों कोई शब्द मरदा है, तां सिर्फ़ इक अक्खर ख़त्म नहीं हुंदा, बल्कि उस शब्द दे ओह्ले लुकी सदियां पुराणी रीत, इक पूरा हुनर, इक ख़ास जज्बात हमेशा लयी दफ़न हो जांदे हन।
अज्ज दा पंजाब मशीनीकरण, बाज़ारवाद अते तकनीकी चकाचौंध दे अजेहे दौर विचों गुज़र रेहा है, जित्थे साड्डी माँ-बोली पंजाबी दी पारम्परिक शब्दावली बहोत तेज़ी नाल अलोप हो रही है। साडी नवीं पीढ़ी अज्ज मॉल-संस्कृति, सोशल मीडिया ते कॉरपोरेट भाषा दे प्रभाव हेठां आ के अपने ही पिंडां दी ज़मीनी शब्दावली तों बेगानी हो चुकी है। खूह, चूल्हे-चौके, खेती-बाड़ी, गहणेयां अते विरसे दी सांझ नाल जुड़े हज़ारों अजेहे ठेठ शब्द हन, जो कदे साड्डे बुज़ुर्गों दी रूह दा हिस्सा सन, पर अज्ज एह महज़ पुराणी किताबां या डिक्शनरियां तक महदूद रह गए हन।
जेकर असीं अज्ज दे बदलदे पंजाब नूँ वेखिए, तां पुराणें पंजाब दी रूहानी सादगी नूँ सुट्ट के नवां मशीनी महल तां बण गया है, पर इस नवें पंजाब विचों साड्डे विरसे दे अनमोल शब्द हौली-हौली विदा हो गये।
पुराणें पंजाब विच श्खूहश् सिर्फ़ पाणी कड्डण दा ज़रिया नहीं सी, बल्कि एह पिंड दी सांझ, चौपाल अते रूहानी रौनक़ दा मुख केन्द्र हुंदा सी। अज्ज सबमर्सिबल पंप अते ट्यूबवेल दे दौर विच खूह मुकम्मल तौर ते बंद हो चुके हन, ते उन्हां नाल जुड़ी इक बडी ही अमीर शब्दावली वी अलोप हो गई है। मसलन ‘टिंड’ मिट्टी या लोहे दा अजेहा छोटा डब्बा या बर्तन, जो इक वड्डी माला या माह्ल विच बन्न्‍ह के खूह दे अन्दर जांदा सी ते पाणी भर के बाहर ल्यौंदा सी। अज्ज दी पीढ़ी नूँ टिंड शब्द दा अर्थ वी नहीं पता।
‘माह्ल’ इक वड्डी ते मज़बूत रस्सी जो कदे मुंज़ या सूतली नाल बणदी सी अते जिस ते टिंडां बन्न्‍हियां जांदियां सन।
‘चक्ली’ अते ‘बेड़’ खूह दे ऊपर बणेया अजेहा लकड़ी या लोहे दा पूरा चक्का, जिस दे सहारे माह्ल घुमदी होंदी सी। इसदी घूं-घूं दी आवाज़ पूरे पिंड विच सवेरे-सवेरे संगीत वरगी गूंजदी सी।
‘गाढ़ी’ इक लकड़ी दा डंडा हुंदा सी जिस ते बैठ के किसान बलदां नूँ हांकदा सी, ताकि खूह गेडे़या जा सके। एह हुनर ते एह शब्द अज्ज दे पंजाब विचों पूरी तरह गायब हो चुके हन।
बुल्ले शाह ने वी खूह अते टिंडां दे बिम्ब राहीं ज़िंदगी दी दार्शनिकता नूँ बयान करदेयां आखेया है-
भर भर टिंडां खाली करदे
एह कुदरत दे ने खेल
कोई आवे कोई जावे
मिट्टी मिट्टी दा ए मेल

पंजाबी सभ्याचार विच रसोई या चौका सिर्फ़ खाण अते बणौण दी जगह नहीं सी, एह माँ दी ममता, धियां दे चाव ते सांझ दी पाठशाला हुंदी सी। अज्ज दे एलपीजी गैस, माइक्रोवेव ते मॉडुलर किचन दे ज़माने विच रसोई दी खुशबू अलोप हो गई है।
‘हारी’ मिट्टी दा बणेया पारम्परिक छोटा चूल्हा हुंदा सी, जिस विच कंडे यानी गोबर कदे उपले या थेपड़ी पा के हौली-हौली दूध कढ़ाया जांदा सी। ओत्थे कढ़ रहे दूध दी खुशबू पूरे घर विच फैल जांदी सी।
‘चाटी’ यानी मिट्टी दा वड्डा घड़ा हुंदा सी, जिस विच सवेरे-सवेरे दही पा के ‘मधाणी’ राहीं मक्खण कड्डेया जांदा सी। जदों पिंड विच सवेरे-सवेरे कइ घरां विचों मधाणी दी ‘घम-घम’ सुणीदी सी, तां एह पिंड दे जाग उठण दा पहला लक्षण हुंदा सी।
अज्ज दे बच्चे ‘बर्गर-पिज्जा; दे स्वाद विच मगन हन, पर एह उन्हां लम्हेयां तों बेगाने हन जदों दादी-नानी हारी विच कढ़ रहे दूध दी मलाई तोड़ के ‘कांसे’ दी थाली विच मक्की दी रोटी ते रखदी सी। जो पंजाब दे समाज़ दा गौरव सी।
पुराने समय विच पिंडां दा समाज़िक ढांचा कई अजेहे शबदां ते टिकेया सी जो आपसी भाईचारे अते सत्कार नूँ वधौंदे सन। अज्ज़ मोबाइल स्क्रीन ते एकाकीपन दे दौर विच एह सारे शब्द गलियां विचों मुक गए हन।
पिंड दे विचकार, बड़ यानी बरगद या पिपल दे रुक्ख थल्ले बणी चौपाल, जित्थे पिंड दे बुज़ुर्ग बैठ के समाज़िक फैसले करदे सन ते सांझियां गल्लां सांझीआं करदे सन। अज्ज एह सब अलोप हो गये हन। कुड़ियां दा सांझा इक्ठ, जित्थे सारियां रात नूँ चरखे कत्तदीयां सन, लोकगीत गौंदीयां सन ते अपने सुख-दुख सांझे करदीयां सन। एह ‘त्रिंझण’ सिर्फ़ चरखा कत्तण दी जगह नहीं सी, एह औरतां दी आज़ादी दा स्व-संगठित केन्द्र सन। एसे तरहां ‘सिट्ठणियां’ व्याह दे वक्त नानके अते दादके वलौं इक-दूजे नूँ दित्तियां जांण वालियां मिठास भरियां काव्यात्मक गालां या व्यंग्य हुंदा सी। एह भाईचारे नूँ वधौण दा हँसमुख ज़रिया सन। अज्ज गवाच गइयां हन।
धनीराम चात्रिक ने लिखेया वी है-
त्रिंझण दे विच्च कत्तन कुड़ियां
चावां दे नाल गावन
ऐसी मिट्टी पाक पंजाब दी
जित्थे रब्ब दे रंग वसावन
अज्ज़ पंजाब दे वड्डे-बुज़ुर्ग ख़ामोश बैठे हन। उन्हां दी एह ख़ामोशी कोई लाचारी नहीं है, बल्कि एह अपणी माँ-बोली दे टूट रहे सरूप नूँ देख के पैदा होया इक गम्भीर मौन है। जदों असीं अपने घर दे बुज़ुर्गां कोल बैठदे हां, तां एह कई वार चुपचाप शून्यता विच वेखदे रहंदे हन। उन्हां दी एह चुप आखदी है कि अज्ज साड्डे कोल शब्द तां बहोत हन, पर उन्हां शब्दां विच जज्बात ते रूहानी मिठास ख़त्म हो चुकी है। इंटरनेट दे ज़रिये शबदां दा आडम्बर रचण नाल भाषा अमीर नहीं हुंदी, भाषा अमीर हुंदी है अपणी मिट्टी नाल जुड़े रहण नाल। जेकर असीं अपनी श्हारीश्, अपनी ‘मधाणी’ ते अपनी ‘सथ’ नूँ शबदां विचों मनफ़ी कर दित्ता, तां साड्डी औण वाली पीढ़ी कोल भाषा तां होवेगी, पर उस भाषा विच पंजाब दी मिट्टी दी खुशबू कदे नहीं आवेगी।
मशीनीकरण ते आधुनिकता दा विरोध नहीं कीता जा सकदा, समय बदलण नाल तब्दीली लाज़मी है, पर अपनी नींह नूँ भुल्ल के कदे वी कोई दरख़्त हरा-भरा नहीं रह सकदा। अज्ज़ लोड़ है कि असीं अपणे घरां विच, अपनी गल्ल-बात विच, ते खास करके अपणे बच्चेयां नाल इन्हां पारम्परिक शबदां नूँ दोबारा साझीदार बणाइए। जदों तक असीं माँ-बोली दे इन्हां ठेठ लफ़्ज़ां नूँ अपनी जीभ ते सजा के रक्खांगे, तद तक पंजाब दी रूहानी विरासत ज़िन्दा रहेगी।
-लेखक जाने-माने शायर व आकाशवाणी के पूर्व वरिष्ठ उद्घोषक हैं