अखाण दी पछाण

राजेश चड्ढ़ा
पंजाबी सभ्याचार अते माँ-बोली दी अमीरियत दा अंदाज़ा एत्थों दी ठेठ शब्दावली अते सदियां पुराणी कहावतां या अखाण तों सहज ही लाया जा सकदा है। एह कहावतां या अखाण महज़ मनोरंजन या तुकबंदी नहीं हन, सगों पंजाब दी मिट्टी विचों उपजे अजेहे दार्शनिक निचोड़ हन जो बुज़ुर्गां ने अपणे जीवन दे कड़े तजुर्बेयां, सुभाव, अणख अते लोक-चेतना राहीं घड़े सन।
पंजाब दी तासीर खेती-बाड़ी, सूफ़ियाना सोच अते कड़े संघर्ष नाल जुड़ी है। इस लयी एत्थों दियां कहावतां विच खूह, खेत, कणक, चूल्हे-चौके अते आम जनजीवन दे बिम्ब बहोत डूँघाई नाल वरते गए हन। एह अखाण या कहावतां कड़े तों कड़े सच, समाज़िक विसंगतियां अते मनुखी फितरत नूँ मिठास भरे व्यंग्य नाल आखे जांण दा अनोखा सामर्थ्य रखदियां हन।
मनुख दा आंतरिक सुभाव केहो जेहा है अते ज्ञान या बक्शिश लयी पात्रता दी की अहमियत है, इसनूँ पंजाबी लोक-मानस ने बहोत ही सरल पर डूँघे लफ़्ज़ां विच बन्नेया है।
श्खोते कूं मक्के लै जाईए,
उह हाजी कदे ना बणदा।श्
जेकर कोई मूरख, अज्ञानी या दुर्जन सुभाव वाला इंसान है, तां उसनूँ चाहे मक्के या किसे वी उत्तम ते पवित्र धार्मिक स्थान दी यात्रा करवा देयो, उसदी सोच या आंतरिक सुभाव विच बदलाव नहीं औंदा।
एह अखाण दस्सदी है कि बाहरी दिखावे या तीर्थ-यात्रावां नाल इंसान दी रूह पवित्र नहीं हुंदी। रूहानी तब्दीली लयी अन्दर दी पात्रता, समझ अते निम्रता लाज़मी है। सूफ़ियाना रिवायत विच वी बाहरी आडम्बरां दी बजाय मन नूँ साफ़ करण ते ज़ोर दित्ता गया है।
‘कौड़े रुक्ख कूं शक्कर पौणा,
कदे ना मिट्ठा होना।’
किसे वी कौड़े पेड़ दी जड़ विच जेकर कोई रोज़ शक्कर पावे, तां वी मीठा फल नहीं दे लगदा, उसदी कड़वाहट बरकरार रहंदी है।
खोटे सुभाव वाले माणसां नाल तुसीं किन्ना वी भला कर लवो, एह औक़ात औण ते अपणी फ़ितरत ज़रूर विखौंदे हन। सुभाव दी कड़वाहट सिर्फ़ रूहानी ज्ञान नाल मिटदी है, दुनियावी लालच नाल नहीं।
संसार दा यथार्थ की है अते समाज़िक रिश्तेयां दी मर्यादा किंवे निभदी है, इन्हां कहावतां विच बहोत ही व्यावहारिक ढंग नाल समझौण दी कोशिश कीती गई है।
‘सच आखिए तां गल्ल पैंदे ने,
फिर सच्चे पास ना बहन्दे ने।’
एस मतलबी दुनिया विच जेकर तुसीं सच्चाई बोल देयोगे, तां लोग तुहाडे नाल लड़ण आ जाणगे अते फेर कदे वी सच्चे इंसान दी संगति करणा पसंद नहीं करणगे।
एह अखाण सिद्धे तौर ते समाज दे पाखंड ते चोट करदी है कि संसार विच झूठ ते चापलूसी दा बाज़ार तां गज़ब दा चलदा है, पर हक़ीक़त या सच सुणन दा माद्दा हर किसे विच नहीं हुंदा। एस लयी बुज़ुर्ग आखदे सन कि कदे-कदे चुप करके गुज़ारे नूँ कर लैणा ही उत्तम हुंदा है।
‘अन्न्हा वंडे शीरणीआं,
मुड़-मुड़ अपणेयां नूँ देवे।’
जदों कोई अन्ना इंसान प्रसाद या मिठाई वंड रेहा होवे, तां हमेशा अपणेयां नूँ ही देखदा है अते वार-वार अपणे करीबियां नूँ ही फड़ौंदा रहंदा है।
एह समाज़िक अते राजनीतिक व्यवस्था ते तिक्खा व्यंग्य है। जदों सत्ता, अधिकार या उच्चे पद ते बैठा कोई इंसान योग्यता नूँ अनदेखा करके सिर्फ़ भाई-भतीजावाद चलौंदा है अते अपने रिश्तेदारों नूँ फ़ायदा पहुँचौंदा है, उस वेले एह कहावत ढुकदी है।
पंजाब दा सभ्याचार श्किरतश् यानी मेहनत ते टिकेया है। एत्थे आलस नूँ गुनाह अते अपणी मेहनत नाल कमाए टुकड़े नूँ सब तों उत्तम मन्नेया गया है।
‘आप मुइयां बिना
सुरग नहीं मिल्दा।’
जेकर स्वर्ग देखणा होवे, तां खुद ही मरणा पैंदा है, कोई दूजा मर के तुहानूँ स्वर्ग नहीं विखा सकदा।
इसदा डूँघा अर्थ एह है कि ज़िंदगी विच जेकर कोई वड्डी कामयाबी, मंज़िल या आत्मज्ञान हासिल करणा होवे, तां अपणी मेहनत खुद ही करणी पैंदी है। दूजे दे भरोसे रह के कदे वी असली तरक्की नहीं कीती जा सकती। किरत दी सच्चाई ही माणसां नूँ आत्मनिर्भर बणौंदी है।
‘जेहा बीजेगा,
तेहा वढेगा।’
किसान खेत दी मिट्टी विच जहे बीज बीजेगा, ओहो जी ही फ़सल उस नूँ वढनी पवेगी।
एह कर्मां दा रूहानी ते दार्शनिक चक्र है। इंसान जहे कर्म इस संसार विच या धरती ते करदा है, उस नूँ अखीरकार उन्हां कर्मां दा फल भुगतना ही पैंदा है। एह अखाण इंसान नूँ नैतिक ते सच्चे मार्ग ते चलण दी प्रेरणा दिंदा है।
पंजाब विच बुज़ुर्गां ने बहोत कड़वे सच नूँ बहोत ही हँसमुख अंदाज़ विच कहावतां या अखाण विच पिरोया है, ताकि सुणन वाले नूँ बुरा वी ना लग्गे ते गल्ल सिद्धे दिल ते असर कर जावे।
‘कच्चा घड़ा कदे ना टिकदा,
जे पावे कोई पाणी।’
मिट्टी दा घड़ा जेकर कच्चा या अग्ग विच बिना पकेया होया होवे, तां उस विच पाणी पौंदे ही गल के मिट्टी हो जांदा है।
झूठ, चालाकी, पाखंड ते दिखावे दे सहारे बणाए गए रिश्ते या चरित्र कदे वी लम्बे समय तक टिक नहीं सकदे। जदों वी वक़्त या मुश्किलां दा पाणी पैंदा है तां कच्ची नींह ढह जांदी है। सिर्फ़ सच ते ईमानदारी दी पक्की मिट्टी ही टिकदी है।
‘गए दंदां नाल स्वाद गया,
अक्खां नाल जहान गया।’
जदों मुँह दे दँद चले जांण तां खाण दा स्वाद चला जांदा है, ते जेकर अक्खां दी ज्योति चली जावे तां पूरी दुनिया ही अलोप हो जांदी है।
एह अखाण समय ते सेहत दी कदर करण दा उपदेश दिंदी है। माणसां नूँ चेतावनी दिती गई है कि जवानी, वक़्त अते तंदुरुस्ती सदा लयी नहीं रहणी। एस लयी समय रहंदे चंगे कर्म कर लए जांण अते सेहत दा सत्कार कीता जावे।
पंजाबी कहावतां या अखाण सिर्फ़ रोज़मर्रा दी गल्ल-बात दा हिस्सा नहीं हन, सगों एह पंजाबी विरसे दी अजेही कीमती विरासत हन जेड़ियां कड़े तों कड़े मानसिक, सामाजिक अते आत्मिक संकट दे समय सानूँ रस्ता विखौंदियां हन।
अज्ज़ दे आधुनिक ते मशीनी दौर विच जदों साड्डी शब्दावली अलोप हो रही है, लोड़ है कि असीं अपणी माँ-बोली दियां इन्हां अनमोल कहावतां नूँ अपणी लेखनी अते ज़बान विच ज़िन्दा रखिए, ताकि पंजाब दी मिट्टी दी असली, पवित्र अते विहारिक खुशबू, सदियां दा तजुर्बा अते बोली दा सरमाया हमेशा कायम रहे।
-लेखक जाने-माने शायर और आकाशवाणी के पूर्व वरिष्ठ उद्घोषक हैं